Падчас сустрэч з маладымі спецыялістамі раённых устаноў і арганізацый карэспандэнты нашай рэдакцыі не прамінаюць магчымасці пагутарыць з юнакамі і дзяўчатамі, пацікавіцца іх справамі, бытавой уладкаванасцю, стаўленнем да першага працоўнага месца, планамі на перспектыву.

Сёння гэтыя пытанні мы задалі кіраўніку гуртка Каменскага сельскага клуба Цэнтралізаванай клубнай сістэмы Бабруйскага раёна Валерыі Уржунцавай. Зрэшты, дзяўчына прыняла ўдзел у раённым конкурсе “Сваёй прафесіяй ганаруся” і стала ўладальніцай адной з прэстыжных намінацый.

— У Бабруйскі раён я прыехала пасля заканчэння Магілёўскага дзяржаўнага каледжа мастацтваў. Выконваць працоўныя абавязкі была накіравана ў Каменскі сельскі клуб, дзе з’яўляюся загадчыкам гуртка, стварыла і вяду тры дзіцячыя творчыя калектывы.  Кіраўніцтва і калектыў Цэнтралізаванай клубнай сістэмы раёна, а таксама маё непасрэднае клубнае начальства сустрэлі мяне надзвычай ветліва. Кожны са свайго боку дапамог у арганізацыі працоўнага месца, у вырашэнні  бытавых пытанняў. Сельскі населены пункт, дзе працую, знаходзіцца побач з Бабруйскам, таму я пасялілася ў горадзе. Плата за здымную кватэру арганізацыяй, як і было абяцана, кампенсуецца.

Як творчы па натуры чалавек і ўладальнік такой прафесіі, я з задавальненнем пагадзілася з прапановай стаць удзельніцай народнага ансамбля танца “Беларусь”. Гэта дало магчымасць рэалізаваць свае творчыя здольнасці, цікава бавіць вольны час, значна пашырыла кола маіх знаёмстваў — зрабіла жыццё на новым месцы яшчэ больш утульным.

Таму ў цэлым мяне ўсё задавальняе — ёсць праца, добры калектыў, надзейныя сябры, цікавы занятак, магчымасць бачыцца з роднымі.   

Алена КАРПЕНКА.

Фота з архіву рэдакцыі.