Як вучні раёна адпачывалі на канікулах
Каб школьнікам на зімовых канікулах не было сумна, каб напоўніць жыццё юных грамадзян яскравымі ўражаннямі, паклапаціліся як ва ўстановах адукацыі раёна, так і на абласным, рэспубліканскім узроўнях. Прапанавалі вучням паўдзельнічаць у шэрагу захапляльных мерапрыемстваў, наладжаных у межах рэспубліканскай акцыі “Нашы дзеці”, урачыстае адкрыццё якой адбылося 15 снежня.
Так, у Гарбацэвіцкай СШ прайшло навагодняе свята з удзелам прадстаўнікоў Міністэрства па падатках і зборах Рэспублікі Беларусь, у Осаўскай БШ — з удзелам міністра па падатках і зборах Сяргея Налівайкі. Малодшыя школьнікі Бортнікаўскай СШ прынялі ўдзел у канцэртна-гульнёвай праграме. Для вучняў 1-4-х класаў Брожскай быў наладжаны навагодні ранішнік “Тэрыторыя чараўніцтва”. У Ленінскай СШ прайшоў святочны баль-маскарад з удзелам старшыні Сычкаўскага сельвыканкама Зінаіды Трубачка і дырэктара ААТ “Саўгас Кісялевічы” Валерыя Сяргейчыка. Ранішнік для маленькіх і святочная праграма “Час верыць у цуд”, дзе прысутнічаў і дырэктар ААТ “Міхалёўская Ніва” Ігар Ганчароў, сустрэлі вучняў Міхалёўскай СШ. У Цялушскай школе для дзяцей наладзілі навагодні квэст “У зімовым лесе” і баль для старшакласнікаў з удзелам дырэктара філіяла “Харчавік-Агра” ААТ “Чырвоны харчавік-АграСэрвіс” Андрэя Шырко. Туголіцкая СШ запрасіла ўсіх вучняў на святочны ранішнік — удзел у мерапрыемстве прыняў і старшыня Слабодкаўскага сельвыканкама Анатоль Шэлег. У Туркоўскай установе адукацыі прайшло навагодняе мерапрыемства з удзелам в. а. старшыні Кавалёўскага сельвыканкама Таццяны Садоўскай. Хімоўская школа правяла для дзяцей навагоднія ранішнікі “Цуды на Новы год” і “Зімовая казка”. У Каменскай СШ наладзілі навагоднюю дыскатэку. І гэта далёка не поўны пералік мерапрыемстваў, якія прайшлі ва ўстановах адукацыі на канікулах.
А яшчэ ў дні зімовага адпачынку ў цэнтры культуры прайшло тэатралізаванае відовішча для дзяцей з удзелам старшыні райвыканкама Аляксандра Сухадольскага. У дзіцячым сацыяльным прытулку раённага сацыяльна-педагагічнага цэнтра — навагодняе свята “Чароўныя крылы Дракона”, наладжанае цэнтрам творчасці. Таксама раённыя школьнікі, дэлегацыя з 13-ці чалавек, прынялі ўдзел у абласным навагоднім дабрачынным свяце для дзяцей з удзелам кіраўніцтва Магілёўскага аблвыканкама, якое прайшло ў Палацы культуры вобласці. Хлопчыкам і дзяўчынкам дзіцячага дома сямейнага тыпу Рак цэнтр творчасці наладзіў гульнёвую праграму “Экспедыцыя па навагодніх традыцыях”. Трое вучняў раёна пабывалі на навагоднім мерапрыемстве ў Палацы Незалежнасці ў Мінску.
Алена КАРПЕНКА.
