Цікавае мерапрыемства, ініцыятарамі якога выступілі Ваенны камісарыят г. Бабруйска, Бабруйскага, Глускага і Кіраўскага раёнаў і адміністрацыя Міхалёўскага ВПК “Дзіцячы сад-СШ”, прайшло ва ўстанове адукацыі сёння ў рамках святкавання дня абаронцы Айчыны і Узброеных Сіл Рэспублікі Беларусь — у госці да школьнікаў завіталі людзі, чыім хобі з’яўляецца рэканструкцыя ваенных падзей. Яны не толькі распавялі пра свой занятак, пра побыт вайскоўцаў ва ўмовах ваенных дзеянняў: гады Вялікай Айчыннай вайны і вайны ў Афганістане, але і ў мірны час, далі магчымасць  хлопчыкам і дзяўчынкам не толькі пазнаёміцца з побытавымі рэчамі вайскоўцаў, зброяй, адзеннем, але і прымерыць іх на сябе.

—  Галоўная мэта рэканструктарскага руху — героіка-патрыятычнае, ваенна-гістарычнае выхаванне падрастаючага пакалення праз паказ таго, як яно было на вайне і ў якіх умовах  даводзіцца несці службу сённяшняму пакаленню вайскоўцаў — абаронцаў нашых рубяжоў. Паказ гістарычнай праўды. Часцяком, расказваючы дзецям пра ўмовы, у якіх давялося жыць салдатам Вялікай Айчынный вайны, даводзіцца адзначаць, што многія нават не ўяўляюць, як можна было   абыходзіцца без халадзільнікаў, мікрахвалявых печаў, без элементарных даброт, якія яны цяпер маюць.  Паказваючы, як было няўтульна, некамфортна ў гады вайны нават у побытавым плане, мы спрабуем данесці да дзяцей, як важна — жыць пад мірным небам, — адзначыў начальнік адасобленай групы Глускага раёна бабруйскага ваенкамата маёр Сяргей Корбут, які адначасова з’яўляецца членам ваенна-гістарычных клубаў “Салдаты Перамогі” і “Доблесць” пры гісторыка-культурным комплексе “Лінія Сталіна”.

Пасля сустрэчы ў сценах школы вучні і рэканструктары перамясціліся да воінскага захавання ў цэнтры аграгарадка, дзе хвілінай маўчання і аружэйнымі залпамі ўшанавалі памяць загінулых землякоў і воінаў, якія, абараняючы Міхалёва, знайшлі на гэтай зямлі свой апошні спачын.

— Нашая галоўная задача — быць удзячнымі, не забывацца на імёны і подзвіг людзей, якія прынеслі нашай зямлі вызваленне ад нямецка-фашысцкіх захопнікаў, — заўважыў у заключэнне сустрэчы намеснік начальніка аддзела прызыву на ваенную службу ваенкамата маёр Уладзімір Моняк. 

Алена КАРПЕНКА. Фота ЮРЫЯ ЮРКЕВІЧА.