Чаму важна зрабіць прышчэпку (інтэрв’ю з намеснікам галоўнага ўрача БГП №2 Людмілай Курскай)

У Беларусі аб’яўлена чацвёртая хваля COVID-19. Як вядома, адзіным надзейным спосабам засцерагчы сябе і сваіх родных ад небяспечнай інфекцыі і, галоўнае — цяжкіх ускладненняў хваробы, з’яўляецца прышчэпка. Каб зрабіць апошнюю, жыхарам нашага раёна, работнікам раённых арганізацый нават не абавязкова ехаць у гарадскую паліклініку: выязныя брыгады медыцынскіх работнікаў Бабруйскай гарадской паліклінікі №2 самі ў гэтых мэтах наведваюцца на вёску. Наколькі выніковы такі падыход медыкаў да прывівачнай кампаніі, ці масава адгукнуліся вяскоўцы на клопат пра іх здароўе і жыццё — у размове з намеснікам галоўнага ўрача БГП №2 Людмілай Курскай.

— Людміла Генадзьеўна, у якіх раённых арганізацыях ужо пабывалі выязныя брыгады медыкаў?

— Нашы брыгады наведалiся ва ўсе буйныя сельскагаспадарчыя арганізацыі раёна. Ёсць установы, дзе такі фармат работы вельмі запатрабаваны: вакцынацыя праходзіць у знаёмай абстаноўцы, сярод калег, без неабходнасці наведвання медыцынскай установы, а значыць — меншай верагоднасці кантакту з носьбітамі віруса. На жаль, некаторыя раённыя ўстановы не ў поўнай меры выкарысталі гэту магчымасць. Таксама нашы медыкі выязжаюць і на ўсе прыпісныя ФАПы. Напрыклад, на гэтым тыдні запланаваны выезд у Гарбацэвіцкі. Да таго ж, у пацыентаў з парушэннямі функцыі руху ёсць магчымасць вакцынацыі ў хатніх умовах.

— Якія прычыны называюць грамадзяне, адмаўляючыся зрабіць прышчэпку?

— Большасць тых, хто адмаўляецца, не могуць дакладна патлумачыць прычыну адказу, маўляў — яшчэ паспеюць вакцынавацца. Іншыя кажуць, што даведаліся з Інтэрнэту аб шкодзе вакцынацыі. Некаторых палохаюць пабочныя эфекты, але пасля невялікай тлумачальнай размовы адразу зга­джаюцца на прышчэпку. Я разумею лю­дзей, якія хвалююцца перад ёй, гэта нармальная рэакцыя на ўсё новае. Пры гэтым нашы медыкі імкнуцца максімальна даступна растлумачыць кожнаму, што прышчэпка — гэта не страшна, а вакцынацыя ў цяперашніх рэаліях — проста неабходнасць. Таксама хачу дадаць, што на ўсіх этапах транспарціроўкі ўмовы захоўвання вакцын не парушаюцца.

— Па якіх пры­чынах медыкі адмаўляюць чалавеку ў прышчэпцы?

— Ёсць супрацьпаказанні часовыя і пастаянныя. Да ліку першых адносяцца вострыя інфекцыйныя і неінфекцыйныя захворванні; абвастрэнне хранічных захворванняў; кантакт з хворым на Covid-19 (вакцынацыю праводзяць пасля завяршэння перыяду самаізаляцыі). Пастаянныя супрацьпаказанні да вакцынацыі — гэта гіперадчувальнасць (анафілактычная рэакцыя ў анамнэзе) да кампанентаў вакцыны або вакцын, якія змяшчаюць аналагічныя кампаненты; цяжкія паствакцынальныя ўскладненні (анафілактычны шок, цяжкія генералізаваныя алергічныя рэакцыі, сутаргавы сіндром, тэмпература вышэй за 40°C і г. д.) на ўвядзенне кампа­­­­­нента I вакцыны; узрост да 18 гадоў. У цяперашні час разглядаецца пытанне аб правядзенні вакцынацыі цяжарных жанчын і жанчын у перыядзе груднога гадавання.

— Людміла Генадзьеўна, чаму ўсё ж важна зрабіць прышчэпку ад COVID-19?

— Чацвёртая хваля COVID-19 паказала, што гэтае захворванне ад нас не сышло. Для таго, каб запаволіць тэмпы распаўсюджвання хваробы, трэба вакцынаваць не меней за 60% насельніцтва. Безумоўна, прышчэпка — гэта не стоадсоткавая гарантыя ад інфекцыі, але яна дазваляе зменшыць нагрузку на арганізм у выпадку захворвання і перанесці яго ў больш лёгкай форме. Вакцынацыя даказала сваю эфектыўнасць. Па нашых назіраннях, у стацыянар у пераважнай большасці трапляюць невакцынаваныя пацыенты. І ў той жа час нельга забываць пра нашэнне масак, дэзінфекцыю рук, захаванне дыстанцыі і здаровы лад жыцця.

Жадаю ўсім жыхарам Бабруйскага раёна заставацца здаровымі.

Размаўляла Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.