У Бабруйскім раёне прайшла алімпіяда па фінансавай граматнасці школьнікаў
Пераможцам раённага этапу алімпіяды па фінансавай граматнасці сярод навучэнцаў 10-11-х класаў устаноў агульнай сярэдняй адукацыі, якая прайшла сёння на базе Брожскай сярэдняй школы, прызнаны вучань Ленінскага ВПК “Дз/с-СШ” Марк Мароз. Дыплом другой ступені па колькасці набраных балаў журы прысудзіла вучаніцы Гарбацэвіцкай СШ Браімавай Лізавеце, 3-га месца ўдастоены Ілля Брэдус з Брожскай СШ.
Такая алімпіяда праводзіцца ў краіне не першы год і ладзіцца пад эгідай Нацыянальнага банка Рэспублікі Беларусь. Апошні прадастаўляе і падарункі дзецям.
Што да Марка, то ён, як мы даведаліся, у алімпіядзе ўзяў удзел упершыню. Немалую дапамогу ў падрыхтоўцы да іспыту хлопцу аказаў настаўнік гісторыі Сяргей Міхайлавіч Герасімовіч. Самога ж вучня тэма гэтая адразу захапіла, і ён дакладна адчувае, што павысіў сваю дасведчанасць у фінансавых пытаннях і можа дапамагчы з гэтым іншым.
Наперадзе ў пераможцаў — удзел у абласным этапе рэспубліканскай алімпіяды.
Алена КАРПЕНКА. Фота аўтара.