Сёлетні каравай больш важкі за мінулагодні
Як стала вядома, у гэтую ўборачную кампанію раённыя сельгасарганізацыі намалацілі 27 952 т зерня збажыны, або 114,4 працэнта ў параўнанні да папярэдняга года. Ураджайнасць у сярэднім па раёне склала 22,6 ц/га, перасягнуўшы мінулагодні паказчык — 20,8 ц/га.
Калі аналізаваць у разрэзе гаспадарак, то найбольшага намалоту дасягнулі аграрыі СВК “Гігант” — 5 576 т (у папярэднім годзе — 5 367 т) і ААТ “Неўскі-Агра”— 5 320 т. Апошнія, прычым, намалот значна павялічылі (3 824 т). Наступная пазіцыя па аб’ёмах атрыманага зерня ў філіяла “Варатынь” ААТ “БЗТДіА” — 3 746 т, што таксама прыкметна болей, чым у мінулым годзе (2 326 т).
Найвышэйшая ўраджайнасць збожжавых культур традыцыйна дасягнута ў “Гіганце” — 38,7 ц/га (у 2018 годзе — 41,9 ц/га). Другі па велічыні паказчык у філіяла “Харчавік-Агра” ААТ “Чырвоны харчавік” — 32 ц/га, што значна вышэй за мінулагодні (23,1 ц/га). На трэцім месцы па ўраджайнасці філіял “Варатынь” ААТ “БЗТДіА” з паказчыкам 31,5 ц/га (у мінулы год — 32,9 ц/га).
Дзяржзаказ раёнам выкананы ў поўным аб’ёме.
Алена КАРПЕНКА (паводле дадзеных райсельгасхарчу).