Болей неабыякавасці ці болей праблем?

Статыстыка

Як стала вядома, за 10 месяцаў сёлетняга года ў Баб­руйскі райвыканкам паступіла 202 звароты — на 20 (11%) болей, чым за аналагічны перыяд папярэдняга года. Звярталіся да ўлады грамадзяне пераважна ў пісьмовай форме (68%). Адзначаны прык­метны рост (25 супраць 7) калектыўных зваротаў, пятая частка з якіх — ад членаў садаводчых таварыстваў адносна членскіх узносаў, правамернасці дзеянняў старшыні і рэвізійнай камісіі, фінансава-гаспадарчай дзейнасці і інш. Але тут варта разумець, як заўважыла начальнік аддзела па рабоце са зваротамі грамадзян райвыканкама Наталля Тропіна, што ў адпаведнасці з пунктам 6 Указа Прэзідэнта Рэспублікі Беларусь ад 28 студзеня 2008 года №50 “Аб мерах па ўпарадкаванні дзейнасці садаводчых таварыстваў” мясцовыя выканаўчыя і распарадчыя органы ў адпаведнасці са сваёй кампетэнцыяй ажыццяўляюць толькі кантроль за дзейнасцю садаводчых таварыстваў, а таксама юрыдычных асоб у частцы мэтавага выкарыстання зямельных участкаў у рамках дзеючага заканадаўства. Кантроль жа за фінансава-гаспадарчай дзейнасцю садовых таварыстваў, па яе словах, у кампетэнцыю дадзеных органаў не ўваходзіць.

Не тут, то там…

Грамадзяне раёна, як і раней, спрабавалі вырашыць існуючую праблему праз вышэйшыя структуры ўлады. Ад апошніх у райвыканкам такім чынам паступіла 18 зваротаў, прыкладна столькі ж (17), як за 10 месяцаў папярэдняга года. Прычынай зваротаў да “вярхоў” стала ў тым ліку абыякавасць да вырашэння ўзнікшага пытання на пярвічным узроўні. А таму 15 адказных асоб, у тым ліку 8 дзяржслужачых, за неналежную арганізацыю работы са зваротамі грамадзян і юрыдычных асоб прыцягнуты да дысцыплінарнай адказнасці. Між тым мае месца, як адзначаюць у райвыканкаме, і злоўжыванне грамадзянамі сваім правам на звароты: некаторыя з іх звярталіся да вышэйшых улад, мінуючы раённы выканаўчы камітэт.

Праблемы хвалявалі розныя?

Тэматыка сёлетніх зваротаў самая разнастайная. Гэта пытанні забеспячэння жыллёва­-камунальнай, дарожнай гаспадарак, працаўладкавання, законнасці і правапарадку, будаўніцтва і архітэктуры, землекарыстання, сельскай гаспадаркі. І ўсё ж пераважалі звароты па пытаннях жыллёвага фонду, жыллёва-камунальнай гаспадаркі — 41% ад агульнай колькасці. На другім месцы — землеўпарадкаванне і землекарыстанне (13%).

Сярод першых найбольш частымі былі тыя, што датычыліся аплаты за вываз камунальных адходаў, аднаўлення пашкоджанай ліўневай каналізацыі, падтаплення ўчастка, водазабеспячэння, закрыцця лазні, набыцця жылых памяшканняў. Прычым іх колькасць, у параўнанні з папярэднім годам, прыкметна павялічылася (на 13 зваротаў). Непасрэдна ў кастрычніку актуальным было пытанне вывазу адходаў з населеных пунк­таў, але на гэтую пару яно ўжо “знята”. Інфармацыя пра налічэнне платы за карыстанне камунальнымі паслугамі даводзіцца да ведама насельніцтва праз СМІ, у прыватнасці, газету “Трыбуна працы”, аднак грамадзяне па-ранейшаму звяртаюцца ў райвыканкам па пытаннях нязгоды з аплатай за вываз адходаў.

Зрэшты, як патлумачыла Наталля Тропіна, у адпавед­насці з пастановай Савета Міністраў Рэспублікі Беларусь №510 ад 29 чэрвеня сёлетняга года “Аб унясенні змен і дапаўненняў у некаторыя пастановы Савета Міністраў Рэспублікі Беларусь”, п. 52, арт. 12 Палажэння аб парадку разлікаў і ўнясенні платы за карыстанне жылымі памяшканнямі дзяржаўнага жыллёвага фонду, зацверджаным пастановай Савета Міністраў РБ ад 12 чэрвеня 2014 года №571, дапоўнены часткай 5 і выкладзены ў наступным змесце: “Плата за зварот з цвёрдымі камунальнымі адходамі ў адносінах аднакватэрных, блакіраваных жылых дамоў, у якіх адсутнічаюць зарэгістраваныя па месцы жыхарства і па месцы знахо­джання, не бярэцца ў выпадку, калі грамадзянін — плацельшчык жыллёва-камунальных паслуг, які з’яўляецца ўладальнікам і карыстальнікам дадзенага жылога дома, пісьмова звярнуўся з заявай у арганізацыю, якая ажыццяўляе дадзеную паслугу ці ажыццяўляе ўлік, разлік і налічэнне платы за жыллёва-камунальныя паслугі і платы за карыстанне жылымі памяшканнямі, аб спыненні аказання паслугі па звароце з цвёрдымі камунальнымі адходамі з указаннем перыяду, але не болей за 6 месяцаў у каляндарным годзе”. Дадзеная змена ўступіла ў сілу 1 кастрычніка сёлетняга года. У сувязі з чым грамадзяне могуць звярнуцца з пашпартам і дакументамі, якія пацвярджаюць права ўласнасці на жылое памяшканне, ва УКП “Жылкамгас” для афармлення заявы на прыпыненне аказання паслугі па вывазу смецця.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.