Не любіць жыццё аднастайнасці

У аздараўленчым лагеры “Сонейка” пры Каменскай СШ кожны новы дзень па-свойму неверагодна цікавы, забаўляльны і яркі. Тэматыка будней шматгранная: дзень харчавання, дзень прыроды, дзень краiны, дзень фальклору, дзень бяспекi i шмат яшчэ цiкавых i пазнавальных дзён.

Але самым эмацыйна насычаным і незабыўным быў дзень вандроўкі ў нашу квітнеючую сталіцу — Мінск. Горад сустрэў пахмурным, нават дажджлівым надвор’ем, аднак рознакаляровы купал у выглядзе глобуса музея Вялікай Айчыннай вайны вярнуў сонейка на небасхіл. У музеі нас чакалі 11 тэматычных залаў з экспанатамі, якія захоўваюць гісторыю вялікай Перамогі. Закончыўся наш шлях у музеі светлай і вялікай залай Перамогі. Тысячы прозвішчаў і халодныя лічбы нагадваюць пра цану мірнага неба.

Далей мы накіраваліся любавацца прасторамі сталіцы. За вокнамі праляталі помнікі і велічныя будынкі, рознакаляровыя клумбы і зялёныя скверы, тэатры і палацы. вуліца мінулагодняга юбіляра М. Багдановіча змянілася вуліцай сёлетняга юбіляра Я. Купалы. Неўзабаве мы апынуліся на плошчы Дзяржаўнага сцяга. Не мог не ўразіць і Палац Незалежнасці, ён прываблівае сваёй вытанчанасцю і веліччу. Залатымі літарамі нам усміхаўся Мінскі дзяржаўны педуніверсітэт імя М. Танка, з процілеглага боку магістралі на нас пазіраў галоўны корпус Белдзяржуніверсітэта. Дом урада і Чырвоны касцёл шчыра віталі сваіх гасцей.

Апошнім пунктам вандроўкі стаў Музей народнай архітэктуры і побыту, што ў в. Азярцо Мінскага раёна. У сялянскіх хатах мы любаваліся рознымі шафамі і куфрамі, бела-чырвонымі рушнікамі, снежна-белымі печкамі. Таксама мы не прайшлі міма лавак з сувенірамі: кожны хацеў набыць сабе саламяную цацку, якая б нагадвала яму аб нашым вандраванні.

Алена ГАЛАЎНЁВА,
намеснік дырэктара па выхаваўчай рабоце Каменскай СШ.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.