Дарослыя, не будзьце абыякавымі!

У ліпені на камісіі па справах непаўналетніх Бабруйскага райвыканкама абмеркавалі вынікі работы за паўгоддзе. Дэтальна прааналізаваўшы кожнае злачынства і правапарушэнне, якое за гэты перыяд часу ўчынілі вясковыя падлеткі, члены камісіі пацвердзілі выснову папярэдніх год: прычына парушэння дзецьмі закону — на бацькоўскім сумленні.

Мовай лічбаў

image35593074Як адзначыла намеснік старшыні камісіі Наталля Праташчык, з пачатку сёлетняга года, у параўнанні да аналагічнага перыяду мінулага, у раёне назіраецца рост падлеткавай злачыннасці з 2 да 3-х выпадкаў. Па двух фактах — крадзяжы і хуліганстве — гэтым часам праводзіцца праверка. Якія будуць прыняты рашэнні — пакажуць яе вынікі.

Што датычыцца адміністрацыйных правапарушэнняў, то за гэты перыяд камісіяй разгледжана 30 матэрыялаў-спраў. З іх 21 — у адносінах дзяцей і 9 — бацькоў. У параўнанні з папярэднім годам адзначаны рост такіх правапарушэнняў, як дробнае хуліганства (12 супраць 3), устаноўлены факты дробных крадзяжоў, якіх у мінулым годзе не было зарэгістравана.

Як станоўчае ў камісіі адзнача­юць зніжэнне з 12 да 2 колькасці адміністрацыйных правапарушэнняў па арт. 17.3 (ужыванне спіртных напояў, псіхатропных рэчаў, знаходжанне ў грамадскім месцы ў нецвярозым стане). Значна знізілася — з 13 да 1 — колькасць адміністрацыйных правапарушэнняў, звязаных з пагарджэннем непаўналетнімі правілаў дарожнага руху. На гэтую акалічнасць паўплывала, па словах намесніка старшыні камісіі, як узмацненне прафілактычнай інфармацыйна-асветніцкай работы, так і дастаткова дзейсная мера — штрафы. Бацькі нарэшце сталі разумець, што, набываючы дзецям мотатранспарт, яны садзейнічаюць учыненню апошнімі правапарушэнняў. Прычым, у выпадках з матацыкламі і скутарамі на непаўналетняга складаецца, як правіла, не адзін, а некалькі пратаколаў — за адсутнасць вадзіцельскага пасведчання, адсутнасць рэгістрацыі транспартнага сродку, тэх­агляду і г. д. Ад 5 да 7 пратаколаў, што ў суме можа “выліцца” у 10 базавых велічынь. Страта такіх грошай, як паказала практыка, магутны сродак уздзеяння на бацькоў — іх цікавасць да баўлення часу дзецьмі адразу павялічваецца.

Усё пачынаецца з сям’і

Той факт, што сям’я — надзвычай моцны асяродак, які ўплывае на фарміраванне характару і паводзін падлеткаў, іх узаемадзеянне з грамадствам, а ў рэшце рэшт і самой сям’ёй, сёлета, па словах Наталлі Праташчык, зноўку пацвердзіўся. Большая частка правапарушальнікаў — дзеці, якія знаходзяцца ў сацыяльна небяспечным становішчы. Маральнае ўз­дзеянне на бацькоў у такіх сем’ях да станоўчага выніку не прыво­дзіць: дзейсным, як правіла, становіцца толькі пакаранне рублём. Сярод 5 непаўналетніх, якія знаходзяцца на ўліку ў камісіі, працягваюць ігнараваць закон, 2 выхоўваюцца ў сем’ях, чыё становішча прызнана сацыяльна-небяспечным, 1 — у няпоўнай, 2 — у шматдзетных, дзе маецца недагляд з боку бацькоў. У дачыненні 2 непаўналетніх пытанне стаіць востра: падчас учынення імі яшчэ аднаго правапарушэння камісія будзе вымушана звярнуцца ў суд для змяшчэння іх ва ўстановы закрытага тыпу — калоніі.

Пры гэтым дарослым, адзнача­юць у камісіі, зачастую не дастае разумення звярнуцца за дапамогай да спецыяліста: псіхолага, псіхіятра ці псіхатэрапеўта, якія здольны станоўча паўплываць на сітуацыю.

Да чаго прыводзяць непаўналетніх шкодныя звычкі

На пастаянным кантролі камісіі, іншых зацікаўленых службаў раёна — і непаўналетнія, якія значацца на ўліку ў наркалагічным дыспансеры. Такіх на сёння 4. Двое пастаўлены на ўлік у сувязі з інгаляцыяй пароў клею, адзін — за ўжыванне насваю (гэтае псіхатропнае рэчыва не забаронена, але наносіць вялікую шкоду псіхіцы чалавека, правакуючы апошняга на супрацьпраўныя ўчынкі), яшчэ адзін — за ўжыванне спіртных напояў. І тут зноў жа трывога, як заўважае Наталля Праташчык, павінна сыходзіць найперш ад бацькоў. Дарослым трэба ісці з дзецьмі да ўрачоў-нарколагаў, а не ча­каць, калі тыя патрапяць у непрыемную гісторыю. Тым болей што самастойны зварот да спецыялістаў ананімны, выключае пастаноўку дзяцей на ўлікі, не ўплывае на іх жаданне мець у далейшым вадзіцельскае пасведчанне, чаго многія памылкова баяцца. У гэтым выпадку бацькі атрымліваюць кампетэнтныя парады, якія дапамагаюць ім “вярнуць” дзяцей у сем’і. Неабходна ведаць і тое, адзначае Наталля Праташчык, што, трапляючы на камісію, непаўналетнія не заўсёды бяруцца на ўлік у наркалагічны дыспансер. У дачыненні некаторых дастаткова прафілактычнай размовы з урачом і бацькоўскага кантролю.

Што датычыцца спажывання падлеткамі наркатычных і псіхатропных прэпаратаў, то такіх фактаў, як адзначылі ў камісіі, сёлета ў раёне не выяўлена.

Аналізуючы прычыны ўчынення непаўналетнімі злачынстваў і правапарушэнняў, намеснік старшыні камісіі адзначыла, што асноўнай з іх па-ранейшаму з’яўляецца бацькоўская няўвага. Дарослыя праяўляюць раўнадушша да таго, дзе і з кім бавяць час іх дзеці, якімі клопатамі і інтарэсамі жывуць. Тым самым садзейнічаюць сыходжанню падлеткаў з прамой жыццёвай дарогі. Калі такое здараецца, хапаюцца за галаву, але выправіць сітуацыю часта ўжо не ўдаецца.

Шаноўныя бацькі! Каб непрыемнасць і бяда не прыйшлі ў ваш дом, не будзьце абыякавымі — праяўляйце цікавасць да тых, каму далі жыццё.

Алена КАРПЕНКА.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.