Старшыню Глушанскага сельскага Савета Марыю Сушчанку прыемна ўразіла, як яна прызнаецца, усё — ад арганізацыі сходу да слоў Прэзідэнта Беларусі Аляксандра Лукашэнкі.

— На мерапрыемстве такога рангу я пабывала ўпершыню, таму сказаць, што спадабалася, — нічога не сказаць. Уражанняў вельмі шмат і выключ­на ўсе станоўчыя. З прыемнасцю назірала, як у зале побач сядзяць рабочы і міністр і аналізуюць, што ўдалося ў краіне зрабіць за апошнія гады, а чаго не дасягнулі, абмяркоўваюць планы на бліжэйшую пяцігодку. Мала таго, што рабочая праграма была добра спланавана, уразіла і культурная. У першы дзень для дэлегатаў была нала­джана экскурсія ў музей Вялікай Айчыннай вайны. Хто там пабываў, са мной пагодзіцца — наколькі яна пазнаваўчая. У другі дзень работы форуму, пасля асноўнай, працоўнай яго часткі, мы змаглі папрысутнічаць на канцэрце “Наш шлях”, у якім прынялі ўдзел вядомыя беларускія артысты і моладзь, а таксама выканаўцы з іншых краін свету.

Калі гаварыць непасрэдна пра рабочыя моманты, то спадабалася, што Аляксандр Лукашэнка ў сваім дак­ладзе — напэўна, гэта адзначыў кожны — падрабязна спыніўся на аналізе таго, чаго не ўдалося дасягнуць і назваў прычыны апошняга. Апладысментамі рэагавала зала на яго словы пра палітычную стабільнасць у краіне, пра паляпшэнне ў апошнія гады дэмаграфічнай сітуацыі, пра высокую міжнародную ацэнку нашага медыцынскага абслугоўвання і г. д. Прыемна было чуць пра павелічэнне экспарту беларускай сельскагаспадарчай прадукцыі, якое стала магчымым дзякуючы праведзенай мадэрнізацыі жывёлаводчых аб’ектаў, укладзеных на гэтыя мэты значных дзяржаўных сродкаў. Дэлегаты падтрымалі Прэзідэнта ў неабходнасці нарошчваць аб’ёмы экспарту канкурэнтаздольнай сельгаспрадукцыі, якая прыносіць дзяржаве грошы.

Радуе, што ў прыярытэце на бліжэйшы час — паляпшэнне якасці жыцця насельніцтва. Гэта стане магчымым дзякуючы ўкараненню новых тэхналогій на вытворчасці, развіццю малога і сярэдняга бізнесу, стварэнню новых працоўных месцаў…

Упэўнена, што, выкладваючыся па максімуму кожны на сваім працоўным месцы, мы зможам выканаць агучаныя Прэзідэнтам задачы, накіраваныя на тое, каб наша краіна і далей квітнела, а людзям у ёй жылося ўтульна і спакойна.

Запісала Алена КАРПЕНКА.