У Магілёве прайшоў 2-гі этап Рэспубліканскага прафсаюзнага конкурсу творчасці працоўных калектываў “Новыя імёны Беларусі-2016”, які праводзіцца ў мэтах далучэння чалавека працы да культурнага, здаровага баўлення вольнага часу, у мэтах папулярызацыі аматарскай мастацкай творчасці працоўных і актывізацыі культурна-масавай работы ў калектывах.

Ад нашага раёна ўдзел у абласным этапе творчага конкурсу прынялі пераможцы раённага этапу, які пры садзеянні Бабруйскага раённага аб’яднання прафсаюзаў адбыўся ў студзені. Гэта члены прафсаюза работнікаў культуры Вольга Васіленка ў суправаджэнні харэаграфічнай групы “Нат­хненне” — у намінацыі “Сцэнічная творчасць”, і мастак-афарміцель цэнтралізаванай клубнай сістэмы раёна Юрый Боўда — у намінацыі “выяўленчая і дэкаратыўна-прыкладная творчасць”.

Прыемна адзначыць, што Юрый Іванавіч зможа прадэманстраваць свае творчыя здольнасці — выставу работ ганчарнага мастацтва — на заключным, рэспубліканскім этапе прафсаюзнага конкурсу.

Пажадаем таленавітаму земляку поспехаў!

Алена КАРПЕНКА.