Утрымліваць падворкі ўласных домаўладанняў і шматпавярховак у чысціні і парадку, не засмечваць вуліцы і дарогі — прамы абавязак кожнага чалавека. І было б добра, адзначаюць у аддзеле жыллёва-камунальнай гаспадаркі райвыканкама, каб для людзей гэта стала яшчэ патрэбай і неабходнасцю.

У нашым раёне, па словах начальніка аддзела Ірыны Пракопчык, створаны ўсе ўмовы для таго, каб смецце, у тым ліку адходы жыццядзейнасці чалавека, якія могуць быць выкарыстаны ў якасці сыравіны для прадпрыемстваў, у дварах не залежваліся, а ў жыхароў населеных пунктаў не было неабходнасці ў стварэнні несанкцыянаваных звалак. Ва ўсіх населеных пунктах УКП “Жылкамгас” ажыццяўляе рэгулярны планавы вываз смецця. На тэрыторыі тых, дзе маюцца шматпавярховыя забудовы, усталяваны кантэйнеры для яго збору, у тым ліку асобнага. Усе магазіны Бабруйскага гандлёвага цэнтра на гэты час ажыццяўляюць прыём (за грошы!) другасных матэрыяльных рэсурсаў, такіх як ПЭТ і шкляная бутэлька, макулатура. Акрамя таго, у гэтых мэтах створаны і дзейнічаюць 3 нарыхтоўчыя пункты на базе Жылкамгаса — у пасёлках Рэдкі Рог, Туголіца і Глуша.

***
Актуальным на гэты час з’яўляецца прывядзенне ў парадак пад’ездаў шматкватэрных дамоў у населеных пунктах намаганнямі саміх жыльцоў. Такім менавіта чынам ужо адрамантаваны 21 пад’езд у пасёлках Туголіца і Глуша. Прыгожа афарбаваныя сцены, прыбраныя фіранкамі вокны, кветкі на падаконніках выклікаюць адчуванне цеплыні, спакою і ўтульнасці ў кожнага, хто заходзіць у пад’езд. У аддзеле ЖКГ адзначаюць — навесці такую прыгажосць, выканаць гэтыя і іншыя рамонтныя работы можна як намаганнямі саміх жыльцоў, так і з дапамогай камунальшчыкаў: УКП “Жылкамгас” аказвае платныя паслугі па рамонце.

Парадак у доме і на падворку, без сумнення, візітная картка гаспадара. Але ж у клопаце пра іх чысціню нельга забывацца на вуліцы і дарогі, не дапускаць іх забруджвання. Нярэдка можна назіраць такую непрыемную з’яву, як неданесенае да кантэйнера смецце, раскіданыя паўз дарогі бутэлькі, папера, пакеты з поліэтылену і іншае.

Вядома ж, каб такіх прыкладаў не было, дарослыя павінны самі культурна абыходзіцца са смеццем і адходамі і з маленства прывучаць (зноў жа — праз уласны прыклад) да гэтай культуры дзяцей.

Чыста не там, дзе прыбіраюць, а там, дзе не смецяць. Асабіста вы ўпэўнены, што, лузгаючы на вуліцы насенне сланечніку, лушпайкі ад яго не будзеце выкідваць на зямлю?

Алена КАРПЕНКА.