Працоўны тыдзень для адказных работнікаў райвыканкама, а таксама кіраўнікоў арганізацый раёна традыцыйна пачаўся з планёркі ў старшыні раённага выканаўчага камітэта Міхаіла Шалкоўскага.

 Робячы справаздачу аб ходзе вясенне-палявых работ, у прыватнасці — сяўбе ярыны, першы намеснік старшыні райвыканкама, начальнік райсельгасхарчу Валерый Сяргейчык адзначыў, што з яравых культур засталося дасеяць толькі кукурузу (на раніцу панядзелка было пасеяна 95 працэнтаў ад плану). Актыўна ў раёне вядуцца і работы па хімічнай апрацоўцы раслін. Цукровыя буракі, да прыкладу, ужо прапалолі двойчы. Прыступілі ў раёне і да яшчэ адной значнай сельскагаспадарчай кампаніі — нарыхтоўкі кармоў. Большасць гаспадарак, па словах Валерыя Сяргейчыка, займаецца нарыхтоўкай сенажу і сіласу, у некаторых — нарыхтоўваюць сена. Адначасова ў гаспадарках рамантуюць зернесушыльныя комплексы і зернеўборачныя камбайны. Словам, выконваецца ўвесь комплекс неабходных на гэты час работ. Між тым, даючы ім ацэнку, Міхаіл Шалкоўскі акцэнтаваў увагу на неабходнасці актывізаваць работы па нарыхтоўцы кармоў.

Завяршыўся яшчэ адзін месяц года. У сувязі з гэтым намеснік старшыні райвыканкама Тамара Рудая нагадала кіраўнікам прадпрыемстваў і арганізацый накіраваць у аддзел эканомікі справаздачы аб выкананні даведзеных паказчыкаў. Тамара Мікалаеўна паведаміла таксама, што гэтым часам распрацоўваецца праект прагнозу сацыяльна-эканамічнага развіцця раёна на 2011 год. 

Па словах намесніка старшыні райвыканкама Святланы Носавай, ва ўсіх школах раёна празвінелі апошнія званкі. На гэтым тыдні выпускнікі будуць здаваць іспыты. Правядзенне выпускных вечароў для вучняў 11-х класаў запланавана на 11 чэрвеня. З мэтай забеспячэння парадку падчас гэтых мерапрыемстваў у кожнай школе  будзе арганізавана дзяжурства грамадскасці і РАУС. Святлана Сяргееўна нагадала аб правядзенні ў суботу, 5 чэрвеня, свята Пушкінскай паэзіі ў Цялушы, а таксама аб правядзенні на гэтым тыдні пасяджэння камісіі па справах непаўналетніх райвыканкама.

Не абыйшлі на планёрцы важнае на гэты час пытанне падрыхтоўкі раёна да ацяпляльнага сезону (аб ходзе падрыхтоўкі далажыў намеснік старшыні райвыканкама Ігар Кісель), і навядзення парадку ў населеных пунктах. Што тычыцца апошняга, то, па словах старшыні раённага Савета дэпутатаў Леаніда Баркоўскага, толькі сельскімі саветамі на мінулым тыдні было выдадзена болей за сто прадпісанняў і складзена тры пратаколы на жыхароў раёна за неналежнае ўтрыманне сваіх домаўладанняў. Працягваюцца работы па ліквідацыі пустуючых дамоў. Значная ўвага надаецца абкосцы тэрыторый населеных пунктаў і дарог. За мінулы тыдзень было абкошана болей за 30 гектараў плошчаў.

Закранаючы пытанні, звязаныя з арганізацыяй закупу малака ў насельніцтва, было адзначана, што кантраляваць сітуацыю, не дапускаць збояў у працэсе закупу павінны ў першую чаргу старшыні сельсаветаў, якім, як нікому іншаму, належыць быць у курсе ўсіх праблемных пытанняў, і своечасова іх папярэджваць.

Алена КАРПЕНКА.