Прафілактычная работа дае станоўчыя вынікі
У раённым выканаўчым камітэце прайшло пашыранае пасяджэнне камісіі па справах непаўналетніх Бабруйскага райвыканкама, на якім былі падведзены вынікі прафілактычнай работы з непаўналетнімі за тры месяцы сёлетняга года.
Як адзначыла намеснік старшыні камісіі па справах непаўналетніх Яўгенія Доўнар, прафілактычная работа, якая была праведзена ўсімі службамі, прывяла да станоўчых вынікаў: спынены рост злачыннасці сярод непаўналетніх. Зменшыліся колькасць падлеткаў, якія ўчынілі злачынствы, удзельная вага злачыннасці і колькасць учыненых крымінальных злачынстваў. Не зарэгістравана “цяжкіх” злачынстваў: забойстваў, грабяжоў, учынены ў асноўным пакражы асабістай маёмасці. Між тым, маюцца адміністрацыйныя правапарушэнні. Усяго з пачатку года іх зарэгістравана 19. Найбольшая іх колькасць здзейснена вучнямі Туголіцкай школы. Яны адзначаны таксама ў Каменскай, Варатынскай, Міхалёўскай школах і ліцэі № 13. Сярод відаў — ужыванне непаўналетнімі алкагольных напояў (Міхалёўскі ВПК), дробнае хуліганства (Осаўскі, Бортнікаўскі, Слабадкоўскі сельсаветы), парушэнне правілаў дарожнага руху (Варатынская школа). Да адміністрацыйнай адказнасці прыцягнуты таксама і некаторыя з бацькоў непаўналетніх.
Калі аналізаваць тэрытарыяльна, то найбольшая колькасць правапарушэнняў учынена непаўналетнімі Слабадкоўскага сельскага Савета, на другім месцы — Сычкаўскі, на трэцім — Осаўскі. На тэрыторыі такіх сельсаветаў як Гарбацэвіцкі, Гарохаўскі, Хімоўскі, Глушанскі пасялковы, дзе прафілактычная работа камісій па справах непаўналетніх пры сельвыканкамах на належным узроўні, выпадкаў адміністрацыйных правапарушэнняў непаўналетнімі не зарэгістравана.
Алена КАРПЕНКА.