Два ўчасткі зямель, у агульным каля 170 гектараў, будзе ўведзена ў севазварот раёна: ААТ “Агракамбінат Бабруйскі” і ААТ “Саўгас Кісялевічы”, у гэтую вясну.

Работы на адзічаўшых, раней меліяраваных землях непадалёк ад вёсак Грабава і Каменка Слабадкоўскага сельсавета меліяратары ААТ “ПМК-84 “Водбуд” пачалі яшчэ ўвосень.

— Найперш выкарчавалі непатрэбную расліннасць. Затым узяліся за ачыстку каналаў меліярацыйнай сістэмы, прамыўку дрэнажных сістэм, што меліся. Уласнымі намаганнямі, трактарамі МТЗ 1221 і 3022, правялі  ворыўныя работы. Далей было вырашана дадаткова пракласці новыя дрэнажныя сістэмы, чым на гэтую пару актыўна  займаемся, — расказвае начальнік участка Аляксандр Васільевіч Кісялёў.

Частка брыгады, сярод якіх і сам Аляксандр Кісялёў, у панядзелак была занята на ўстаноўцы калодзежа, прызначэнне якога — паглынаць ваду, перанакіроўваць лішкі вільгаці, якія могуць здарацца вясной, у сажалку. Далей вада (з дапамогай калектара) будзе адводзіцца ў канаву.

Фронт работ на ўчастку па рэканструкцыі меліярацыйнай сістэмы быў вызначаны вялікі. Каб усё ахапіць, хутчэй здаць аб’ект, меліяратары працуюць з поўнай выкладкай, як кажуць, і па суботах.

— Стараемся, каб у аграрнікаў была магчымасць засеяць палі і атрымаць з іх ураджай яшчэ ў гэтым годзе, — кажа начальнік участка.

Дарэчы, і ў “Агракамбінаце Бабруйскі”, і ў “Саўгасе Кісялевічы” нанова меліяраваныя землі засеюць мнагалетняй травой, якая, з вялікай верагоднасцю, тут павінна быць ураджайнай.

Алена КАРПЕНКА. Фота аўтара.