Пашыраны сход прайшоў у Вялікіх Бортніках
Пашыраны сход з удзелам грамадскасці Бортнікаўскага сельсавета прайшоў у мінулую пятніцу ў мясцовым Доме культуры. На сустрэчу з жыхарамі аграгарадка сабраліся прадстаўнікі райвыканкама на чале з намеснікам старшыні Таццянай Варанко, а таксама кіраўнікі арганізацый, чыімі паслугамі карыстаюцца вяскоўцы.
Праблемай для мясцовасці бортнікаўцы назвалі перабоі ў цэнтральным водазабеспячэнні, якія на працягу года здараюцца, пакідаючы без вадаправоднай вады ўсё насельніцтва аграгарадка.
Як патлумачыў дырэктар УКП “Жылкамгас” Андрэй Кукулаў, такія сітуацыі здараюцца падчас аварый на лініі водазабеспячэння і ўзнікаюць з-за таго, што на вадаправодзе, які абслугоўвае населены пункт, не прадугледжаны перамычкі, якія б дазволілі адключаць толькі аварыйны ўчастак. Пытанне жылкамгасам узята на кантроль, будуць шукацца шляхі, а галоўнае — сродкі для яго вырашэння. Дэфіцыт апошніх, як было адзначана, на сумленні ў тым ліку жыхароў Бортнікаўскага сельсавета, якія маюць запазычанасць перад камунальнікамі за аказаныя паслугі. А вось палепшыць якасць вады бортнікаўцам абяцаюць на працягу бліжэйшага года — у гэтых мэтах будзе пабудавана станцыя абезжалезвання, участак пад яе ўжо вылучаны, вырашаюцца апошнія пытанні з дакументацыяй.
Яшчэ адно важнае пытанне, якое цікавіла жыхароў сельсавета і тлумачэнне па якім яны атрымалі ад прадстаўніка Бабруйскага сельскага раёна электрычных сетак, датычылася дадатковага энергазабеспячэння ў сувязі з увядзеннем у строй айчыннай атамнай электрастанцыі — апошняе дазволіць прыватнікам устаноўку электракатлоў неабходнай магутнасці для забеспячэння цяпла і гарачай вады ў доме. Прысутным у дэталях распавялі пра тарыфы на дадатковую электрычнасць і куды звяртацца, каб стварыць тэхнічныя ўмовы для гэтага.
Не абыйшлося без традыцыйнага для вёскі “светлавога” пытання. Жыхары адной з вуліц паскардзіліся на не прадуманае ўсталяванне ліхтароў, іншыя — на непрацягласць часу іх работы.
Падымалася пытанне ўсталявання ў аграгарадку дадатковых кантэйнерных пляцовак для смецця, а таксама — абслугоўвання дарог, якія не значацца на балансе спецыялізаваных арганізацый.
Агучаныя праблемы зацікаўленымі службамі прыняты да ведама ў мэтах вывучэння і рэагавання на іх.
Алена КАРПЕНКА. Фота аўтара.