Семінар-нарада з удзелам старшыні камітэта па сельскай гаспадарцы і харчаванні Магілёўскага аблвыканкама Віктара Віткоўскага прайшоў на базе філіяла “Варатынь” ААТ “БЗТДіА” ў аўторак на мінулым тыдні. Мерапрыемства праводзілася для кіраўнікоў, галоўных зааветспецыялістаў, загадчыкаў малочна-таварных ферм сельгасарганізацый Бабруйскага і Глускага раёнаў.

Падчас тэарэтычнай часткі семінара намеснік старшыні камітэта Алена Бодак распавяла пра асноўныя паказчыкі галіны вобласці, у тым ліку Бабруйскага і Глускага раёнаў, за 8 месяцаў. Падрабязна спынілася на тэхналагічных падыходах да вырошчвання маладняку буйной рагатай жывёлы, стварэнні ўмоў для атрымання яго здаровым і наступнага захавання.

Развіццё нованароджаных цялят, як было адзначана, нашмат залежыць ад умоў утрымання, догляду і кармлення рагуль-маці. Таму ў час практычнай часткі семінара якая прайшла на МТФ “Варатынь”, было дэтальна абмеркавана, як і чым трэба карміць жывёлу ў перыяд сухастою, якія энергетычныя дабаўкі выкарыстоўваць у транзітны перыяд (два тыдні да ацёлу і тры — пасля). Там жа быў прадэманстраваны такі тэхналагічны момант, як выпайка малозівам нованароджанага цяляці. Заакцэнтавана ўвага на асноўных якасцях, якія прад’яўляюцца да малозіва ў гэтым выпадку і павінны быць вытрыманы, да раздою каровы пасля цялення, на іншых важных фактарах, здольных прывесці да нарошчвання аб’ёмаў жывёлаводчай прадукцыі.

Алена КАРПЕНКА.