Паслугі лазні, як мы даведаліся, у раёне аказвае УКП “Жылкамгас”. На балансе прадпрыемства значыцца лазнева-пральны комплекс на 25 памыйных месцаў у пас. Глуша і лазня ў Рэдкім Розе. Праўда, апошняя з-за адмоўнага фінансавага выніку і нізкай гадавой загружанасці функцыянаванне прыпыніла.

Што да комплекса ў Глушы, то ў 2018 годзе там быў праведзены цякучы рамонт, на які жылкамгас затраціў 1418 рублёў. На сёння кошт адной памыўкі (за 2 гадзіны), у адпаведнасці з рашэннем Магілёўскага аблвыканкама ад 21 снежня 2018 года №5016, складае 4,70 рублёў. Для зручнасці наведвальнікаў у банны дзень працуе парыкмахер.

Варта адзначыць, што амаль у паловы з 8732 хатніх гаспадарак раёна маюцца ўласныя лазні.

Пры гэтым сярод мерапрыемстваў раённага плана па забеспячэнні насельніцтва даступнымі і якаснымі паслугамі лазняў, зацверджанага рашэннем Бабруйскага райвыканкама ад 30 кастрычніка 2018 г. №24-11, — прыцягненне прыватнага бізнесу да гэтага накірунку дзейнасці. На сёння такая ўзаемасувязь наладжана — за вызначаную плату паслугі лазняў і душавых вяскоўцам гатовы аказаць і аказваюць на аб’ектах агратурызму, якіх у раёне дастаткова шмат. У іх ліку — сядзібы “Ізабэла”, “Ранчо”, “Сакун И.Н.” у аг. Леніна, “У Шчаткава” — у аднайменным населеным пункце, «Тры львы» — у в. Сычкава, “Воля” — у в. Лысая Горка, “У Пятровіча” — у Новай Шараеўшчыне, “Адпачынак плюс” — у Вішнёўцы, “Церамок” — у аг. Міхалёва, “Спадчына” — у Глушы, “Тихий омут” — у в. Дойнічава, “Чистые пруды” — у в. Убалацце, “Экзотика” — у в. Спорнае.

Акрамя таго, адпаведнымі паслугамі вяскоўцы могуць скарыстацца і на тэрыторыі аб’ектаў сельскагаспадарчых прадпрыемстваў раёна.

Алена КАРПЕНКА.
Фота носіць ілюстрацыйны характар.