Госці “Вянка дружбы” завіталі ў Цялушу
Поўнай залай, па-сяброўску шчыра і цёпла прывіталі жыхары аг. Цялуша дзіцячы калектыў з Ізраіля — шоу-тэатр “Алевай +” пад кіраўніцтвам Ларысы Шылінай. Мерапрыемства прайшло ў мясцовым сельскім Доме культуры ў чацвер у рамках Міжнароднага фестывалю “Вянок дружбы”.
Сустрэлі замежных гасцей традыцыйна хлебам-соллю, шквалам апладысментаў і авацый, якія, разам з кветкамі, не стамляліся дарыць і на працягу ўсяго канцэрта. Адначасова з прывітальнымі словамі і падзякай за цудоўную праграму дырэктар філіяла “Харчавік-Агра” ААТ “Чырвоны харчавік” Міхаіл Стрыжэўскі ўручыў гасцям фірмовую бабруйскую салодкасць — зефір.
Падчас сяброўскай сустрэчы сваё творчае майстэрства прадэманстравалі і гаспадары: дзіцячы калектыў “Барбарыскі” і фальклёрны — “Дубрава” Цялушскага СДК.
Напрыканцы мерапрыемства артысты і арганізатары сумесна наведалі магілу ўнучкі Пушкіна — Натальі Варанцовай-Вельямінавай і зрабілі, у гонар дружбы, фотаздымак на памяць.
Алена КАРПЕНКА.