Сярод калектываў ферм па вырошчванні буйной рагатай жывёлы пераможцам прызнаны калектыў малочна-таварнай фермы “Савічы” філіяла “Харчавік-Агра” ААТ “Чырвоны харчавік”.

Пра ферму і дасягненні яе работнікаў мы неаднойчы пісалі. З мінулага снежня тут перамены — калектыў узначаліла новая загадчыца, доб­ра вядомая чытачам “раёнкі” Вольга Аляксандраўна Шкра­дзюк, неаднаразовая пераможца раённага спаборніцтва ў намінацыі “Лепшая маладая даярка”.

З маленства прывучаная да сельскагаспадарчай працы, прайшоўшы на гэтай жа ферме школу прафесійнага майстэрства, Вольга выбудоўвае адносіны ў калектыве так, каб працягнуць слаўную традыцыю папярэдніцы, Тамары Пятроўны Дудаль (жанчына пайшла на заслужаны адпачынак) — дасягаць высокіх вытворчых вынікаў.
Сёння на МТФ “Савічы” ўтрымліваецца 384 галавы дойнага статку і 300 — маладняку да шасці месяцаў. Абслугоўваюць гэтую немалую гаспадарку шэсць даярак, пяць жывёлаводаў, чатыры цялятніцы, тры слесары і столькі ж вартаўнікоў.

“Заробак кожнага залежыць ад яго асабістага ўнёску, —
адзначае Вольга Шкрадзюк. — Ведаючы гэта, людзі працуюць на сумленне — каб і сабе добра, і гаспадарцы карысць”.

За 2018 год на адну рагулю тут надаілі 4868 кг малака, пераўзыйшоўшы (+57 кг) мінулагодні паказчык.

Самым сур’ёзным чынам ставяцца работнікі і спецыялісты МТФ “Савічы” да догляду маладняку буйной рагатай жывёлы, строга прытрымліваюцца ў гэтым тэхналогій. З адказнасцю падыходзяць да рацыёнаў кармлення, іншых важных патрабаванняў, пільна сочаць за станам здароўя жывёлы. Ад гэтага маюць і нядрэнныя вынікі — сярэднесутачныя прывагі за год склалі 702 г (+19 г).

Алена КАРПЕНКА. Фота з архіву.