Пра гэта варта паклапаціцца ўжо цяпер. Камітэтам па сельскай гаспадарцы і харчаванні аблвыканкама ў гэтых мэтах даведзена раёнам заданне пасеяць кармавых культур на зялёны корм (для выкарыстання ўвесну) з разліку 50 сотак на адну рагулю. Аб’ёмы для нашага раёна — звыш чатырох тысяч гектараў.

Да рэалізацыі задання прыступілі пакуль толькі ў ААТ “Міхалёўская Ніва”, дзе на ўчарашнюю раніцу было пасеяна каля 100 гектараў палосных (азімая сурэпіца з жытам) пасеваў. Актывізуюцца дадзеныя работы ўжо пасля таго як у гаспадарках пасеюць азімы рапс. На апошняе гэтым часам скіраваны асноўныя намаганні аграрыяў: тэрмін да 25 жніўня — аптымальны для пасеву культуры. Тым болей што аб’ёмы сяўбы рапсу немалыя — 2690 га на зерне і 300 — на зялёны корм. Па апошніх дадзеных, пасеяна прыкладна трэць плошчаў.

Акрамя іншага, у раёне вядуцца ворыўныя работы пад сяўбу азімай збажыны. Засеяць плануецца каля 13 тысяч гектараў, прыкладна столькі, як у мінулым годзе. “З культур стаўку хацелася б зрабіць на азімае жыта, — заўважае начальнік вытворчага аддзела райсельгасхарчу Жана Жукоўская, — аднак з-за сёлетняга яго неўраджаю ў асобных гаспадарках маецца праблема з насеннем”.

Да капання бульбы ў раёне пакуль не прыступалі. Што датычыцца цукровых буракоў, то ў “Міхалёўскай Ніве” іх уборку запланавалі на пачатак наступнага тыдня.

Алена КАРПЕНКА.