Вынікі работы за 2017 год і задачы на сёлетні абмеркавалі члены Савета Бабруйскага раённага аб’яднання прафсаюзаў, які адбыўся ў мінулую пятніцу з удзелам начальніка галоўнага юрыдычнага аддзела Федэрацыі прафсаюзаў Беларусі Марыны Лазар.

Заакцэнтаваўшы ўвагу на асноўных момантах работы ў мінулым годзе, старшыня раённага аб’яднання прафсаюзаў Людміла Крычко адзначыла, што яна вялася па ўсіх накірунках дзейнасці прафсаюзаў і была накіравана на дасягненне галоўнай задачы грамадскай арганізацыі — абарону правоў і законных інтарэсаў працоўных. У гэтай сувязі, як было адзначана, раённае аб’яднанне право­дзіла маніторынгі па пытаннях забеспячэння патрабаванняў аховы працы — у тым ліку выканання тэмпературнага рэжыму, па выплаце заробнай платы, кантралявала выкананне выдадзеных рэкамендацый. На пастаяннай аснове на працягу года вяліся прыёмы грамадзян як прававымі інспектарамі ФПБ, так і непасрэдна старшынёй раённага аб’яднання, што дазваляла своечасова рэагаваць на праблемныя пытанні. У мэтах стымулявання працоўнай ініцыятывы работнікаў раённае аб’яднанне не раз заахвочвала членаў прафсаюза, чыя праца была прызнана найбольш паспяховай, а таксама актывістаў прафсаюзных пярвічак.

Удзельнічала ў патрыятычным выхаванні грама­дзян — праведзены месячнікі “Захаваем памяць на вякі”, “Кветкі Вялікай Перамогі”, ініцыявала акцыю “Прафсаюзы — дзецям”, конкурс на лепшую прафсаюзную пярвічку, шэраг спартыўных мерапрыемстваў. У сваім дакладзе Людміла Крычко спынілася і на праблемах, якія мясцоваму аб’яднанню прафсаюзаў сумесна з сацыяльнымі партнёрамі прыдзецца вырашаць. Гэта і запазычанасць па зарплаце ў шэрагу арганізацый, і заключэнне з добрасумленнымі работнікамі кантрактаў на адзін год, адсутнасць прафсаюзных пярвічак на прадпрыемствах прыватнай формы ўласнасці і, як вынік, — немагчымасць іх абароны падчас спрэчных пытанняў з наймальнікам, недастатковая ўвага да адпачынку працоўных — невыкарыстанне ў гэтых мэтах паслуг Белпрафсаюзкурорта і Беларустурыста, і іншыя.

Выступ Людмілы Крычко дапоўнілі старшыні райкамаў прафсаюза работнікаў адукацыі і навукі Таццяна Бокач, культуры, інфармацыі, спорту і турызму Аксана Кучынская, а таксама лідары асобных прафсаюзных пярвічак.

Прадстаўнік ФПБ нагадала аб важных момантах, якія неабходна ўлічваць падчас распрацоўкі і заключэння калектыўнага дагавору, каб у выніку мець дакумент, сапраўды здольны гарантаваць члену прафсаюза яго правы і гарантыі. Акцэнтуючы ўвагу на правядзенні ФПБ планавых праверак у арганізацыях, заўважыла, што ў тыя з іх, дзе праблемы не вырашаюцца, праверкі могуць быць наладжаны і пазапланава. Спыніўшыся на Дэкрэце №1, Марына Лазар адзначыла, што дзяржаўны дакумент накіраваны “не на збор грошай, а на працаўладкаванне грамадзян”. Тыя, хто па той ці іншай прычыне пакуль не могуць удзельнічаць у фінансаванні дзяржаўных паслуг, будуць пачутыя. У адносінах жа тых, хто не хоча працаваць, бу­дуць прадпрыняты адпаведныя меры.

Прадстаўнік ФПБ падзякавала раённаму актыву грамадскай арганізацыі, старшыням прафсаюзных пярвічак за работу, якую яны праводзяць, у асноўным на добраахвотнай аснове, па стварэнні бяспечных і камфортных умоў працы, забеспячэнні сацыяльных гарантый. Каб чалавек працы адчуваў да сябе пашану.

Алена КАРПЕНКА. Фота аўтара.