Жніво-2017: да канчатковай падрыхтаванасці тэхнікі засталіся лічаныя дні
За тыдзень усе няспраўныя агрэгаты прывесці ў баявую гатоўнасць — такая задача была пастаўлена перад сельгасвытворцамі на абласным семінары, які прайшоў на базе УКСВ “Дабраволец” на Клічаўшчыне.
Наколькі яе выкананне магчыма ў нашым раёне і, увогуле, ці дастатковыя ў нас тэхнічныя магчымасці, каб уборку збажыны правесці ў аптымальныя тэрміны і якасна? Якая падрыхтаванасць камбайнаў і сушыльняў да жніва? Ці забяспечаны сельгаспрадпрыемствы вопытнымі і сумленнымі механізатарамі? За адказам на гэтыя пытанні мы звярнуліся да начальніка вытворчага аддзела ўпраўлення сельскай гаспадаркі і харчавання райвыканкама Яўгена Аляксандравіча Бярозкіна.
Яўген Бярозкін аддзначыў, что ў цэлым па раёне тэхнікі дастаткова, каб правесці ўборку ў максімальна кароткія тэрміны. Між тым ужо цяпер можна сказаць, што ўборачная кампанія сёлетняга года будзе напружанай: надвор’е непрадказальнае, частыя дажджы, а гэта значыць — працаваць, хутчэй за ўсё, прыйдзецца з падвоенай нагрузкай на тэхніку. На гэтую пару падрыхтаванасць уборачных камбайнаў у раёне складае 83 працэнты. Разлічваем, што да 24 ліпеня — задача пастаўлена менавіта такая — будзем гатовы стопрацэнтна, сур’ёзных перашкод для гэтага ў сельгаспрадпрыемстваў няма. Работ засталося няшмат, у прыватнасці, завяршаем правядзенне тэхнічнага абслугоўвання. І галоўнае — ёсць маральная падрыхтаванасць людзей. Камбайнеры гатовыя выйсці на хлебную ніву і ўступіць у барацьбу за ўраджай.
Што да сушыльнай гаспадаркі раёна, то пакуль 4 зернесушыльні застаюцца непадрыхтаванымі. Але ж да 24 ліпеня час ёсць, і мы робім усё магчымае, каб і гэтыя сістэмы па дапрацоўцы зерня своечасова “сталі ў строй”.
Калі тэхнічную падрыхтоўку да жніва характэрызаваць у разрэзе гаспадарак, то лідары ў нас нязменныя — СВК “Гігант”, філіялы “Харчавік-Агра” ААТ “Чырвоны харчавік” і “Агракамбінат КХП” ААТ “Бабруйскі камбінат хлебапрадуктаў” (засталіся нязначныя падрыхтоўчыя работы). А такім акцыянерным таварыствам, як “Міхалёўская Ніва”, “Неўскі-Агра”, “Стасеўка”, каб быць падрыхтаванымі да 24 ліпеня, трэба папрацаваць надзвычай напружана.
З кадрамі механізатараў у гаспадарках вырашана. На сёння ўсе зернеўборачныя камбайны ўкамплектаваны працаздольнымі экіпажамі.
Алена КАРПЕНКА.
