1 кастрычніка ў краіне адзначылі Дзень пажылых людзей. З нагоды гэтага літаральна ва ўсіх клубных установах і бібліятэках прайшлі або пройдуць у выхадныя дні святочныя мерапрыемствы самых розных форм.

Да прыкладу, 30 верасня ў Каменскім сельскім Доме культуры прайшоў святочны агеньчык пад назвай “Каб старасць была ў радасць”. Агеньчыкі “Мае гады, маё багацце” і “Ах, гэтыя цёплыя сустрэчы” прайшлі ў Бортнікаўскім і Туголіцкім СДК. Пажылых глушанцаў 1 кастрычніка сабрала вечарына “Ад усёй душы”, а жыхароў Гарбацэвічаў — пасядзелкі “У сяброўстве неразлучныя”. У Осава ў дзень 1 кастрычніка была наладжана святочная канцэртная праграма “Багацце сталых гадоў”.

Усе гэтыя мерапрыемствы далі магчымасць немаладым людзям, ветэранам вайны і працы сабрацца разам, прыгадаць былое, паўдзельнічаць у песенных конкурсах, словам, — адпачыць.

Між іншым, самі пажылыя людзі лічаць, што ў сталасці, гэтак жа як і ў любой іншай пары жыцця чалавечага, ёсць шчаслівыя і прыемныя моманты. А што да настрою, то ён залежыць, у першую чаргу, ад самога чалавека.

Алена КАРПЕНКА.