Бабруйск актыўна рыхтуецца да святкавання знамянальных дат — Дня вызвалення горада ад нямецка-фашысцкіх захопнікаў, 630-годдзя горада на Бярэзіне, а таксама да Міжнароднага фестывалю народнай творчасці “Вянок дружбы”.

Не застаецца ў баку ад значных па­дзей і Бабруйскі раён. Як паведаміла начальнік аддзела ідэалагічнай работы, культуры і па справах моладзі райвыканкама Галіна Чарнова, раён прыме ўдзел у “Вянку дружбы”, а таксама ў інвестыцыйным форуме 30 чэрвеня. У межах фестывалю ў сельскіх дамах культуры будуць наладжаны канцэртныя праграмы, удзел у якіх прымуць 14 міжнародных калектываў. Падчас інвестфоруму будзе працаваць выстава — прэзентацыя раённых турыстычных аб’ектаў, а нашыя творчыя калектывы наладзяць для ўдзельнікаў форуму канцэрт. Акрамя гэтага, 1 і 2 ліпеня на адной з гарадскіх пляцовак будзе праца­ваць раённы стылізаваны падворак “Глушанскі хутарок”, удзельнікі якога збіраюцца тут жа гатаваць і частаваць традыцыйнай беларус­кай стравай — духмянымі дранікамі, як бабруйчан, так і гасцей урачыстасцей. 2 ліпеня калектывы раёна са званнямі “народны” і “узорны” прадэманструюць свае творчае майстэрства на цэнтральнай сцэнічнай пляцоўцы Бабруйска — на плошчы Леніна.

Алена КАРПЕНКА.