У філіяле «Агракамбінат КХП» пасяўная плаўна пяройдзе ў корманарыхтоўку
Пасяўная кампанія ў раёне завяршаецца. Карэспандэнты нашай газеты выкарыстоўваюць любую магчымасць, каб наведацца на палі сельгасарганізацый, пацікавіцца справамі і настроем галоўных удзельнікаў пасяўной — механізатараў, і доблесную іх працу на карысць раёна і краіны ўвекавечыць на старонках “Трыбуны працы”.
У панядзелак з гэтай мэтай мы пабывалі на палях філіяла “Агракамбінат КХП” ААТ “Бабруйскі камбінат хлебапрадуктаў”.
Першы, каго за работай засталі, быў механізатар Барыс Кавалёў.
На багушоўскім полі земляроб сеяў адналетнікі, якія ў гаспадарцы, пры ўмове ўраджайнага года, збіраюцца выкарыстаць на зялёны корм жывёле. Крыху пазней на сваім МТЗ-3022 у звязцы з сеялкай АКПМ-6 Барыс Міхайлавіч збіраўся працягнуць гэтую ж справу на полі паблізу в. Дойнічава.
Ад механізатара даведаліся, што падчас другой, не меней значнай сельскагаспадарчай кампаніі — нарыхтоўкі травянога корму, да якой у гаспадарцы падыходзяць адказна, наш суразмоўца будзе “хадзіць альбо з касілкай, альбо з прэсам”. Пры любым раскладзе, як ён заўважае, адказнасць ускладзе на сябе аднолькава вялікую.
На полі ля Рымаўцоў Аляксандр Булацкі сеяў кукурузу.
Трактар МТЗ-1221 з сеялкай “Мона-7” упэўнена хадзіў па полі, падымаючы за сабой унушальныя клубы пылу — глеба прагне вільгаці. Тэхніка механізатара аснашчана камп’ютарам, таму на запытанне, які фронт работ выкананы, земляроб упэўнена называе лічбу 14 (га). Падчас корманарыхтоўкі Аляксандр збіраецца працаваць на “Ягуары”, у функцыях якога падбіраць і здрабняць скошаную траву. Вопыта ў маладога механізатара для адказных работ дастаткова — прыйшоў у гаспадарку 8 год таму, адразу пасля заканчэння Гарохаўскай школы.
Механізатара, які дастаўляе на поле насенне кукурузы, мы не засталі (сфатаграфавалі толькі мяхі з ім), аднак ад калег даведаліся, што гэтыя абавязкі ўскладзены на трактарыста Дзмітрыя Соцікава.
На гэтым жа полі, толькі прыкметна наперадзе, Пётр Красімаў на трактары МТЗ-3022 з дыскатарамі займаўся перадпасяўной падрыхтоўкай глебы. Сучасная тэхніка з кандыцыянерам, таму паўдзённая спёка, як заўважыў земляроб, не перашкаджае яму засяроджвацца выключна на даручанай справе.
— Ну і зразумела, калі ўмовы працы камфортныя, калі свеціць сонца і цяпло, калі ёсць усведамленне, што займаешся такой патрэбнай справай, то і настрой цудоўны, — адзначае на развітанне Пётр Пятровіч і ўпэўнена падымаецца ў кабіну трактара.
Наступнай тэхнікай нашага субяседніка ў гэтым сезоне стане зернеўборачны камбайн, таму адразу пасля пасяўной механізатар возьмецца за яго падрыхтоўку.
На гэтую пару, як расказаў в.а. дырэктара філіяла “Агракамбінат КХП” Аляксандр Атрохаў, у гаспадарцы завяршаюць сеяць кукурузу і прыступілі да сяўбы цеплалюбівых культур, такіх як соя (сеюць упершыню і ў асноўным на насеннікі), сорга цукровая. Апошняя — культура новая, не баіцца засушлівага надвор’я, дае звычайна добры ўраджай, і нават два за год, і даспадобы жывёле. Увогуле, па словах кіраўніка, у агракамбінаце імкнуцца да вырошчвання багатых на бялок, а таму надзвычай запатрабаваных для патрэб жывёлагадоўлі культур. Кармавыя бабы, да прыкладу, у мінулым годзе сеялі на плошчы 30 га, сёлета ўжо пасеялі 150 га. Што да бульбы, то яе пасадка ў гаспадарцы не планавалася, аднак, улічыўшы просьбы калектываў філіяла і галаўнога прадпрыемства, 20 гектараў клубнямі ўсё ж засадзяць — да гэтай работы таксама прыступілі. І ўжо да канца тыдня ў філіяле прыступяць да нарыхтоўкі травянога корму. Рамонтныя работы тут актыўна вяліся на працягу ўсяго падрыхтоўчага перыяду. Тэхнікі і механізатараў для забеспячэння бесперабойнай працы падчас корманарыхтоўкі ў гаспадарцы дастаткова. Як і ў пасяўную кампанію, усе задзейнічаныя на сенакосе, будуць атрымліваць гарачае харчаванне. Яго мясцовыя кухаркі, па словах Аляксандра Атрохава, гатуюць надзвычай смачна.
Алена КАРПЕНКА.
Фота Юрыя ЮРКЕВІЧА.
