У сераду на гэтым тыдні на базе філіяла “Варатынь” ААТ “БЗТДіА” прайшла вытворчая нарада па жывёлагадоўлі. Яе ўдзельнікі: галоўныя заатэхнікі, ветэрынары, эканамісты раённых гаспадарак, спецыялісты ўпраўлення сельскай гаспадаркі і харчавання райвыканкама, міжраённай ветлабараторыі, іншых зацікаўленых службаў, а таксама прадстаўнікі Глускага райсельгасхарчу, якія прыехалі пераняць у калег станоўчы вопыт, — абмеркавалі пытанні, звязаныя з павелічэннем вытворчасці і рэалізацыі малака, і праводзімыя ў раёне, і непасрэдна ў “Варатыні”, мерапрыемствы па садзеянні апошняму.

Адкрыў мерапрыемства начальнік упраўлення сельскай гаспадаркі і харчавання Баб­руйскага райвыканкама Дзміт­рый Харчанка. Ён пазнаёміў прысутных з планам работы семінару і заакцэнтаваў увагу на значнасці абмяркоўваемай тэмы. В.а. дырэктара філіяла Уладзімір Давыдзенка пазнаёміў удзельнікаў семінара са станам жывёлагадоўлі ў гаспадарцы і непасрэдна на комп­лексе «Варатынь». Першы намеснік начальніка райсельгасхарчу Аляксандр Кісялёў заакцэнтаваў увагу на створаных у гаспадарцы станоўчых умовах для навацельных кароў, на якасным спосабе іх раздою, які не патрабуе вялікіх грашовых уліванняў і годны для пера­няцця іншымі сельгасарганізацыямі, на арганізацыі догляду цялятак ад нараджэння да трохмесячнага ўзросту, які даз­валяе захаваць маладняк 100-працэнтна. З усім гэтым удзельнікі семінара маглі пазнаёміцца ўвачавідкі.

Другая частка мерапрыемства прайшла на тэрыторыі луга-пашавых угоддзяў філіяла, дзе ажыццяўляецца дзённы выпас дойнага статку і дзе таксама было што пера­няць. У прыватнасці, прысутных зацікавіў “паклетачны” метад выкарыстання пашавых угоддзяў. Тэрыторыя выпасу ўмоўна нарэзана на клеткі, што не даз­валяе рагулям разыходзіцца па ўсёй пашы, даючы траве ў клетках, якія часова не выкарыстоўваюцца, якасна пад­няцца. Вынікі ад арганізаванага такім чынам выпасу відавочныя — за 10 дзён па надоях значна прыбавілі.
Падчас плянарнага пасяджэння, якое прайшло ў Сельскім доме культуры аг. Варатынь, абмеркавалі вынікі работы ў малочнай галіне раёна за два тыдні мая, да галоўных спецыялістаў давялі задачы на бліжэйшую перспектыву. Няпростыя, але вырашальныя — пры ўмове сумленнага падыходу да выканання сваіх працоўных абавязкаў усімі і кожным, хто задзейнічаны ў вытворчым працэсе.

Алена КАРПЕНКА.
Фота Юрыя ЮРКЕВІЧА.