Ажылі палі з вясною
У разгары ворыўныя работы. Як паведамілі ва ўпраўленні сельскай гаспадаркі і харчавання райвыканкама, на гэты час у раёне заарана 20% ад запланаваных на вясну плошчаў (3 300 га). У гаспадарках займаюцца закрыццём вільгаці і падрыхтоўкай глебы да сяўбы ранніх зерневых і зернебабовых.
Актыўна ў гэтым плане працуе філіял “Харчавік-Агра” ААТ “Чырвоны харчавік”, дзе, акрамя таго што пасеяны авёс, маецца 77% веснавога ворыва, завяршылі падсейванне мнагалетняй травы (108%).
У сельгасарганізацыях таксама займаюцца выбаркай элітнага насення для аднаўлення гатунковага складу — выбрана амаль палова ад запланаванага. З найлепшага боку тут адзначаюць філіял “Агракамбінат КХП” ААТ “Бабруйскі камбінат хлебапрадуктаў”, дзе выбралі 170% да запланаванага. Цалкам выбралі эліту ў ЗАТ “Птушкафабрыка “Вішнёўка”, 40% ад патрэбы — у ААТ “Стасеўка”.
У радзе гаспадарак вядзецца падкормка азімых зерневых і рапсу азотнымі мінеральнымі ўгнаеннямі. Рапсу падкормлена 14% ад патрэбы. Пастаўлена задача — за тры наступныя дні гэтую работу завяршыць, каб да 6 красавіка — аптымальны тэрмін — паспець уздобіць зерневыя. Зрэшты, у “Харчавіку-Агра” гэтыя культуры ўжо падкормлены на плошчы 500 га (63% ад патрэбы), вядзецца гэтая работа ў дачыненні мнагалетнікаў, сенакосаў і пашы. Першым у раёне філіял прыступіў да яе перазалужвання, закладкі шматгадовай пашы.
Актыўна вывозіцца на палі арганіка. З 222 тыс. тон (70% ад плану), што вывезены, каля 69 тыс. — унесена ў глебу.
У ААТ “Міхалёўская Ніва” і “Неўскі-Агра” не пакідаюць без увагі яблыневыя сады: працягваюць іх абрэзку і пабелку.
Варта адзначыць, што перад шэрагам гаспадарак, за выключэннем “Гіганта”, птушкафабрыкі “Вішнёўка”, філіялаў “Агракамбінат КХП” і “Харчавік-Агра”, стаіць пытанне набыцця сродкаў аховы раслін — пратруты яравых зерневых культур. Як яно будзе вырашацца — пакажа час.
Алена КАРПЕНКА.