Той факт, што ў спісе перадавікоў раённага спаборніцтва па выніках мінулага года ў шэрагу намінацый — СВК “Гігант”, упэўнена, нікога не здзівіў. Успрымаць гаспадарку лідарам у раёне настолькі натуральна, што здзівіла б, каб было па-іншаму.

Між тым, самі “гігантаўцы”, і ў прыватнасці старшыня Міхаіл Левакоў, пра дасягненні адыйшоўшага года гавораць з асцярожнасцю, бо, як і папярэдні, ён выдаўся няпростым: памянялася кан’юнктура рынку, не садзейнічала раслінаводству надвор’е. Прафесійна займаючыся бульбаводствам, укладваючы ў вытворчасць культуры немалыя грошы, у гаспадарцы з-за засухі не атрымалі ўраджаю, на які разлічвалі. Валавы збор зерня ў параўнанні да папярэдняга года хоць і павялічылі, але не настолькі, каб быць задаволенымі. Але, нягледзячы на зніжэнне эфектыўнасці работы ў раслінаводчай галіне, аптымізму і працаздольнасці калектыў не страціў. Тым больш, што многае надзвычай парадавала — ураджай кукурузы, соі, некаторых іншых культур. У гаспадарцы прыклалі ўсе намаганні для таго, каб сабраны ўраджай рэалізаваць з максімальнай выгадай. Калі гаварыць пра бульбу, то на сёння ў сховішчы чакае свайго часу зусім нязначны аб’ём клубняў — стабілізацыйны фонд на выпадак іх недахопу ў гандлёвых кропках вобласці.

Насуперак няпростым у эканамічным плане 2015-2016 гадам гаспадарка не толькі трывала выстаяла на нагах, але і знайшла магчымасці развівацца, укараняць перадавыя тэхналогіі, наладжваць новую вытворчасць. Калі абставіны добра складуцца, то ўжо ў маі ў “Гіганце” будзе рэалізаваны (пры падтрымцы інавацыйнага фонду) буйны інвестпраект — запрацуе сучасны камбікормавы завод (на фота) па выпуску не толькі непасрэдна камбікармоў, але і каштоўных для выкарыстання ў жывёлагадоўлі біядабавак. Што, акрамя іншых станоўчых момантаў, прывядзе да стварэння на сяле дадатковых працоўных месцаў. У размове пра гэта ў сельгаспрадпрыемстве спасылаюцца на пагаворку — немец яйкі ў адзін кошык не кладзе: пры зніжэнні эканамічнага эфекту ад аднаго віду дзейнасці можна будзе спаслацца на іншы, каб у выніку — гаспадарка жыла, людзі працавалі і мелі магчымасць карміць сем’і. Менавіта ў апошнім, па словах старшыні СВК, заключаецца сутнасць калектыўнай гаспадаркі і прызначэнне яго як кіраўніка.

Разважаючы пра задачы на бліжэйшую перспектыву, кіраўнік адзначае, што галоўная з іх — захаваць каманду дзейсных працаўнікоў розных прафесій, якая ў гаспадарцы склалася, і выйсці на паказчыкі не толькі 2014 года, але і вышэйшыя. Магчымасці для гэтага ў “Гіганце” маюцца. І галоўная з іх — сумленныя людзі, чыя нялёгкая і высакародная праца — у аснове дабрабыту гаспадаркі і заслугоўвае самых шчырых слоў прызнання і падзякі.

Зрэшты, улічваючы тое, што нашая размова з Міхаілам Пятровічам вялася напярэдадні “мужчынскага” і “жаночага” святаў, кіраўнік СВК “Гігант” пажадаў свайму калектыву, ветэранам працы здароўя і дабрабыту. “Усе разам крызіс мы абавязкова пераадолеем, — адзначыў ён, — і выйдзем з яго ўдвая мацнейшымі”.

Алена КАРПЕНКА.
Фота Юрыя ЮРКЕВІЧА.