У аддзеле жыллёва-камунальнай гаспадаркі райвыканкама на гэтае пытанне даюць станоўчы адказ. Па словах начальніка аддзела Ірыны Пракопчык, зацверджаныя рашэннямі абласнога і раённага выканкамаў мерапрыемствы па падрыхтоўцы народнай гаспадаркі раёна да работы ў асенне-зімовы перыяд выкананы, пра што сведчаць пашпарты гатоўнасці, выдадзеныя ўсім без выключэння спажыўцам цеплавой энергіі і цеплакрыніцам. Апошніх у раёне 48 і 81 адпаведна.

Немалую падрыхтоўчую работу, як і штогод, правёў УКП “Жылкамгас”. У асноўным яна датычыцца падрыхтоўкі кацельна-цеплавой гаспадаркі і жыллёвага фонду. Гэта прафілактычны і капітальны рамонт катлоў на кацельных, выпрабаванне абсталявання на ўсіх катлах, ачыстка іх унутраных паверхняў, гідраўлічнае апрабаванне цеплавых сетак і іх апрабаванне на разліковую тэмпературу, абследаванне шэрагу стальных дымавых труб кацельных з тэрмінам эксплуатацыі болей за 10 год, тэхабслугоўванне катлоў, якія адпрацавалі прызначаны тэрмін, прафілактычны рамонт цеплавых пунктаў і сістэм ацяплення жылых дамоў і г. д.

Для хуткага рэагавання на ліквідацыю магчымых аварыйных сітуацый на аб’ектах цеплазабеспячэння ў жылкамгасе створаны 2 брыгады, ёсць неабходны запас матэрыялаў і абсталявання. На выпадак аварыйных сітуацый маецца дызель-генератар, а да канца года на сродкі з рэспубліканскага і абласнога бюджэтаў плануецца набыць яшчэ адзін, большай магутнасці.

Працягваюцца работы па замене і будаўніцтве цеплавых сетак. Па стане на 26 кастрычніка пракладзены 1 км пі-трубой у пас. Туголіца, што адпавядае плану. Таксама працягваюцца запланаваныя работы па капітальным рамонце жыллёвага фонду ў Рэдкім Розе і Туголіцы.

Што датычыцца бюджэтных арганізацый, то яны да зімы падрыхтаваны. Ва ўстановах адукацыі, у прыватнасці, маюцца цэнтральнае водазабеспячэнне і ацяпленне, праведзены планава-папераджальныя работы па абслугоўванні электраабсталявання кацельных. У Бортнікаўскім і Глушанскім ВПК адрамантавана сістэма ацяплення. Дзякуючы спонсарскай дапамозе ААТ “Бабушкіна крынка” заменены 2 аконных блокі на сучасныя пластыкавыя. У Каменскім дзіцячым садку заменены насос у кацельнай. Там жа і ў Гарбацэвіцкім садку выкананы касметычныя рамонты кацельных.

Немалая работа праведзена ва ўстановах культуры. Гэта і гідраўлічныя апрабаванні сістэм ацяплення і элеватарных вузлоў, і прамыўка апошніх, планавая праверка прыбораў уліку цеплаэнергіі, рэвізія засоўнай арматуры і абсталявання, паверка манометраў і інш.

Падчас падрыхтоўкі сельскагаспадарчых арганізацый асаблівая ўвага звярталася на жывёлагадоўчыя аб’екты — гатоўнасць цеплакрыніц і ацяпляльных сістэм вытворчых і адміністрацыйных памяшканняў, камплектацыю электратэхнічнага персаналу і наяўнасць адказных за электрагаспадарку.

Вядома ж, рыхтаваліся да зімовых умоў работы і дарожнікі. Яны адрамантавалі неабходную тэхніку, набылі пад поўную патрэбу солі і саляных сумясей. За кошт сродкаў раённага бюджэту выканалі работы па цякучым рамонце аўтадарог унутры населеных пунктаў на суму 43 752,00 рублёў.

Важным момантам падрыхтоўкі да ацяпляльнага перыяду з’яўляецца нарыхтоўка паліва. Пра яго ў раёне таксама паклапаціліся. Бюджэтнымі арганізацыямі паліва цалкам нарыхтавана. Жылкамгас нарыхтоўку дроў і дранкі працягвае і вя­дзе гэтую работу ў адпаведнасці з планам. Што датычыцца насельніцтва, то ўсе жадаючыя набыць дровы і паліўныя брыкеты могуць звярнуцца за гэтым у Бабруйскі гаррайтопзбыт. На сёлетні год у раённым бюджэце прадугледжаны асігнаванні на кампенсацыю розніцы ў цэнах на цвёрдыя віды паліва, што рэалізуюцца жыхарам раёна, і часткі гандлёвай надбаўкі на суму 319 739,40 рублёў.

Алена КАРПЕНКА.