Вірус можна папярэдзіць
Асеннія халады правакуюць распаўсюджанне вострых рэспіраторных вірусных інфекцый.
Як паведамілі ў Бабруйскім занальным цэнтры гігіены і эпідэміялогіі, у верасні сёлетняга года выпадкаў захворвання на дадзеныя інфекцыі зарэгістравана на 50 працэнтаў болей, чым у верасні мінулага. Гэтым часам сітуацыя некалькі выраўнялася, аднак ёсць верагоднасць таго, што колькасць захворванняў на ВРВІ і грып з цягам часу можа дасягнуць сярэдняй і вышэйшай мяжы. Таму надзвычай важна ўжо цяпер засцерагчыся ад хваробы прышчэпкай. Для бясплатнай вакцынацыі дзяцей групы рызыкі паступіла 4 тысячы доз вакцыны кітайскай вытворчасці, якая не адзін год выкарыстоўваецца ва ўсім свеце. На платнай аснове: за сродкі прадпрыемстваў і арганізацый, а таксама ўласныя, зрабіць прышчэпку можна ў любой паліклініцы горада Бабруйска, прычым, тую, якую грамадзянін пажадае.
Па меркаваннях медыкаў, жыхары Бабруйшчыны да свайго здароўя адносяцца граматна, з разуменнем таго, што засцерагчыся ад хваробы вакцынай нашмат танней, чым потым лячыцца.
Алена КАРПЕНКА.