Прадуктовы магазін з такой назвай прыватнага прадпрыемства “Дімір” гасцінна запрасіў у мінулую пятніцу пакупнікоў — жыхароў аграгарадка і навакольных вёсак. Нягледзячы на дрэннае надвор’е, якое зацягнулася на ўвесь дзень, на ўрачыстасць з нагоды адкрыцця гандлёвай кропкі міхалёўцы прыйшлі цэлымі сем’ямі. Няўтульнасць ад дажджу і неабходнасць хавацца пад парасонамі кампенсавалі цудоўная канцэртная праграма, падрыхтаваная раённымі артыстамі, і звычайная цікавасць — а што ж за дзвярыма?

Там сапраўды было на што паглядзець, але пра гэта крыху ніжэй. Пакуль адзначым, што, звярнуўшыся да прысутных, дырэктар прыватнага прадпрыемства Ірына Прэсняк падзякавала ім за вытрымку і маральную падтрымку і паабяцала, што “Алёнка” будзе радаваць сваіх пакупнікоў шырынёй асартыменту, “дэмакратычнымі” цэнамі, якасным абслугоўваннем і зручным графікам: да 22 гадзін у летнюю пару, да 21-й — у зімнюю, без абедзенага перапынку. Тавар у магазіне — ад шматлікіх беларускіх вытворцаў. Хлеб, да прыкладу, не толькі бабруйскіх прадпрыемстваў, але і сталічны, што для спажыўца, вядома ж, плюс: ёсць магчымасць выбару і па цане, і па гусце. Гэтае ж датычыцца і іншых тавараў — тут прадстаўлены ўсе групы прадуктаў.

Адкрыццё магазіна — хвалюючая падзея і для пакупнікоў, і для гаспадароў. Віншуючы апошніх з гэтым, начальнік аддзела эканомікі Баб­руйскага райвыканкама Таццяна Сцепанян пажадала Ірыне Прэсняк і калектыву плённай працы. Адзначыла, што прыход прыватніка на вёс­ку апраўданы: здаровая канкурэнцыя дае пакупніку магчымасць выбіраць, а гандаль, незалежна ад формы ўласнасці, прымушае развівацца. Да таго ж, гэта стварэнне новых працоўных месцаў, што для сельскай мясцовасці актуальна як ніколі.
Да слова сказаць, магазін у Міхалёва — трэці на рахунку прыватнага прадпрыемства. Раней гандлёвыя кропкі пачалі працаваць у Гарбацэвічах і аграгарадку Леніна. На запытанне — чаму менавіта на раёне, дырэктар — сама родам з Пабокавічаў — адказвае проста: «Хачу, каб наш раён квітнеў і развіваўся».

Алена КАРПЕНКА. Фота Юліі ЛАМАШКА.