На працягу трох дзён — з 28 па 30 студзеня — у гасцініцы «Турыст» г. Мінска ўпершыню прайшла прафсаюзная экскурсійна-турыстычная выстава «Прафтур-2016».

Арганізуючы дадзенае мерапрыемства, Федэрацыя прафсаюзаў Беларусі сумесна з турыстычна-экскурсійным УП “Беларустурыст” і УП “Белпрафсаюзкурорт” ставілі за мэту адраджэнне прафсаюзнага экскурсійнага турызму, які б быў арыентаваны на выкананне не толькі індывідуальных заяў на экскурсіі, але і працоўных калектываў. Як адзначыла генеральны дырэктар “Беларустурыста” Людміла Сянькоўская, “гэта магчымасць для нашых працоўных, членаў прафсаюзаў пашырэння падарожжаў за межамі краіны”.

Як адзначыла старшыня Бабруйскага раённага аб’яднання прафсаюзаў Людміла Крычко, якая таксама прысутнічала на галіновым турыстычным форуме, у студзеньскія дні на сталічнай пляцоўцы сабраліся прафсаюзныя тураператары 6 краін блізкага і далёкага замежжа. Прадстаўнікамі ўсіх краін-­удзельніц быў падпісаны афіцыйны дакумент аб супрацоўніцтве, што, трэба спа­дзявацца, стане першым крокам да ўзаемадзеяння паміж тураператарамі прафсаюзаў Беларусі, Грузіі, Казахстана, Малдовы, Расіі і Узбекістана. Падарожжы ў гэтыя краіны для беларусаў стануць на 20 працэнтаў дзешавейшымі. Напярэдадні такое пагадненне было падпісана таксама і з В’етнамам.

На выставе былі прадастаўлены турыстычныя магчымасці ўсіх рэгіёнаў Беларусі — раённыя і гарадскія аб’яднанні прафсаюзаў на працягу мінулага года займаліся распрацоўкай унікальных, невядомых да гэтага маршрутаў. 1-е месца ў конкурсе распрацовак прысуджана ў Магілёўскай вобласці Слаўгарадскаму раёну. На падставе матэрыялаў выставы Федэрацыя прафсаюзаў выпусціла зборнік з картай у разрэзе кожнага раёна. Падчас мерапрыемства “Беларустурыстам” і прафсаюзнымі здраўніцамі былі прадэманстраваны ўсе паслугі, якія яны аказваюць. Удзельнікі пазнаёміліся як з ужо вядомымі накірункамі экскурсійнага турызму і аздараўлення, так і з шэрагам новых.

Да слова сказаць, “Беларус­турыст” і “Белпрафсаюзкурорт” на шэраг паслуг прадастаўляюць членам прафсаюза 25-працэнтную скідку.

Прайшоў савет раённага аб’яднання прафсаюзаў

5 лютага ў райвыканкаме працаваў савет раённага аб’яднання прафсаюзаў, асноўным пытаннем якога было “Аб прафсаюзнай экскурсійна-турыстычнай выставе “Прафтур-2016”.

Старшыня аб’яднання Людміла Крычко пазнаёміла членаў савета з асноўнымі момантамі работы форуму, дасягненнямі прафсаюзнай экскурсійна-турыстычнай выставы і ўказала на неабходнасць давядзення дадзенай інфармацыі да кожнага члена прафсаюза. Разам з тым яна акцэнтавала ўвагу прысутных на нізкай актыўнасці прафсаюзных арганізацый раёна па ўдзеле ў рэспубліканскім прафсаюзным конкурсе — выпрацоўцы турыстычных маршрутаў. Заклікала членаў савета ў далейшым праяўляць болей увагі рэалізацыі станоўчых ініцыятыў Федэрацыі прафсаюзаў Беларусі і раённага аб’яднання прафсаюзаў, накіраваных на павышэнне якасці жыцця членаў арганізацыі, падняцце іміджу прафсаюзнага руху.
Т.У. Бокач, старшыня райкама прафсаюза работнікаў адукацыі і навукі, давяла да прысутных Пастанову Савета Федэрацыі прафсаюзаў Беларусі “Аб стандарце прафсаюзнага бюджэту”.
Сярод асноўных пунктаў пастановы, выпрацаванай саветам раённага аб’яднання прафсаюзаў, — давесці яе да ведама ўсіх членаў прафсаюза, забяспечыць прывядзенне лакальных нарматыўных прававых актаў прафсаюзных арганізацый у адпаведнасці з вышэйзгаданымі пастановамі.

Алена КАРПЕНКА. Фота з архіву раённага аб’яднання прафсаюзаў.