Пашыраны сход з удзелам грамадскасці Варатынскага сельсавета прайшоў у СДК аг. Варатынь у сераду на гэтым тыдні. На сустрэчу з вяскоўцамі і работнікамі мясцовых арганізацый прыбылі намеснік старшыні райвыканкама Святлана Носава, пракурор раёна Ігар Савасцееў, прадстаўнікі РАУС, гаррай­аддзела па НС, раённых арганізацый, упраўленняў і аддзелаў райвыканкама.

Падчас сходу да жыхароў сельсавета была даведзена інфармацыя прафілактычнага накірунку. У прыватнасці, завострана ўвага на такіх актуальных пытаннях, як папярэджанне крадзяжоў маёмасці грамадзян праз больш адказныя іх адносіны да захавання апошняй, папярэджанне правапарушэнняў і злачынстваў і адказнасць за іх, недапушчэнне пажараў і гібелі людзей. У дачыненні апошняга намеснік старшыні нагадала, што ў гэтыя дні працягваецца работа аглядных камісій, члены якіх робяць паўторныя абходы домаўладанняў, дзе раней былі выяўлены тыя ці іншыя парушэнні супрацьпажарнай бяспекі. Гаспадарам, якія не паклапаціліся іх выправіць, а значыць, працягваюць ствараць пагрозу сабе і іншым, прыдзецца панесці адміністрацыйнае пакаранне. Таксама ўвага прысутных, у сувязі з апошнімі міжнароднымі падзеямі — тэрактамі ў расійскім самалёце і сталіцы Францыі — была заакцэнтавана на павелічэнні іх пільнасці ў дачыненні ўсяго, што можа ствараць пагрозу для жыцця людзей: на вуліцы, у памяшканні, у грамадскім транспарце і г. д.

Шмат увагі было ўдзелена сем’ям, дзе дзеці знаходзяцца ў сацыяльна-небяспечным становішчы. Такіх на тэрыторыі сельсавета 5. Заслухаўшы па-асобку кожнага з бацькоў на прадмет таго, што дакладна зроблена імі па паляпшэнні ўмоў жыцця непаўналетніх, грамадскасць і прадстаўнікі зацікаўленых службаў вынеслі папярэджанні (аб адабранні дзяцей з сем’яў) тым з іх, чые паводзіны працягваюць насцярожваць. Паўсталі перад судом грамадскасці сельсавета таксама мясцовыя дэбашыры, грамадзяне, якія ўхіляюцца ад навядзення чысціні і парадку на ўласных надзелах і вакол іх, злосныя неплацельшчыкі — за камунальныя паслугі і вынесеныя органамі ўнутраных спраў штрафы.

І, вядома ж, падчас сходу былі абмеркаваны надзённыя праблемы і прапановы жыхароў сельсавета. Сярод апошніх — неадпаведнасць патрэбам жыхароў аграгарадка асвятлення вуліцы Савецкай, адсутнасць у мясцовых магазінах радыёпрыёмнікаў, неабходнасць у замене абсталявання зубалячэбнага кабінета на больш сучаснае. Усе гэтыя пытанні прыняты прадстаўнікамі ўлады да ўвагі.

Алена КАРПЕНКА.