Настаўніка гісторыі і грамадазнаўства Ленінскага ВПК “Дзіцячы сад-СШ” С.М. Герасімовіча ў раёне добра ведаюць. Яго імя неаднойчы згадвалася падчас жнівеньскай канферэнцыі педагогаў і штораз у кантэксце добрых спраў.

Сустрэўшы Сяргея Міхайлавіча ў дзень канферэнцыі, не змагла не пацікавіцца, з якім настроем сустракае вопытны настаўнік 1-га верасня. І не здзі­вілася, калі пачула: “ З цудоўным!”

— Без 1-га верасня не бывае 31 мая, — з жартам заўважае мой суразмоўца. — А калі ўсур’ёз, то першы восеньскі дзень для мяне заўсёды свята: ад сустрэчы з калегамі, дзецьмі, ад таго цікавага, што чакае ў навучальным годзе.

У настаўніцкім жыцці Сяргея Міхайлавіча сёлетні Дзень ведаў —12-ты па ліку. Штогод яго навучэнцы паказваюць добрыя веды на цэнтралізаваным тэсціраванні (сёлетнее не выключэнне), становяцца пераможцамі раённых, абласных і рэспубліканскіх конкурсаў. У мінулым годзе, да прыкладу, вучань Сяргея Міхайлавіча стаў уладальнікам Дыплома 3-й ступені па выніках рэспубліканскага інтэрнэт-конкурсу “Першая сусветная вайна”. Трох дыпломаў, за выніковы ўдзел у рэспубліканскім конкурсе метадычных распрацовак, удастоіўся і сам педагог. Сяргей Міхайлавіч на працягу не аднаго года цесна супрацоўнічае з “Беларускім гістарычным часопісам”, дзе рэгулярна друкуюцца яго метадычныя распрацоўкі ўрокаў, артыкулы па пытаннях выкладання гісторыі ў школе. Сістэма навучання педагога, як ён сам заўважае, склалася адносна даўно. Галоўнае ў ёй — зацікавіць вучня, матываваць яго.

У планах настаўніка на новы навучальны год, як і ў папярэднія гады, рыхтавацца са школьнікамі да алімпіяд, конкурсаў, цэнтралізаванага тэсціравання, а гэта значыць — перадаваць ім свае веды, вучыць дзяцей працаваць.

Дарэчы, Сяргей Міхайлавіч упэўнены: каб дзеці “адгукнуліся”, настаўнік павінен быць адкрыты для іх, гатовы з імі супрацоўнічаць.

Алена КАРПЕНКА. Фота Юрыя ЮРКЕВІЧА.