Калектыў сельскагаспадарчага вытворчага кааператыву “Стасеўка” прызнаны пераможцам раённага спаборніцтва сярод сельскагаспадарчых арганізацый раёна, якія дасягнулі найлепшых вынікаў на веснавых палявых работах.

У гаспадарцы прызнаюцца: такой раскладцы папярэднічала напружаная і зладжаная работа ўсяго калектыву СВК і найперш механізатараў — вопытных і моладзі, якія працавалі на сяўбе з раніцы да позняга вечара. Сярод апошніх — Сяргей Віктаравіч Лісіцын, Васіль Маркавіч Радзіонаў, Яўген Валер’евіч Валенчыц, Дзмітрый Уладзіміравіч Гнётаў і іншыя. Тон пасяўным работам задаваў, вядома ж, кіраўнік. Старшыня вытворчага кааператыву Васіль Архіпавіч Левакоў за гады работы з зямлёй трывала ўсвядоміў: залог добрага ўраджаю — у тэхналогіі яе апрацоўкі, у тым, што пасееш, як пасееш і калі. На гэта і рабілася стаўка. Па натуры “гаспадар” — другія эпітэты тут залішнія — кіраўнік сельгасарганізацыі не дапускае іншага падыходу да зямлі і ў сваіх падначаленых. Наведваючыся на поле не па адным разе на дзень, ён уласна кантраляваў ход пасяўных работ, даваў слушныя парады і рэкамендацыі. Усе вышэйзгаданыя складаючыя і прывялі да таго, што веснавыя палявыя работы прайшлі ў гаспадарцы якасна, у аптымальныя тэрміны — на 29 мая ўсяго ярыны было пасеяна 102 працэнты да плану — і ў адпаведнасці з тэхналагічнымі патрабаваннямі.

Алена КАРПЕНКА. Фота Андрэя СІЛІВОНЧЫКА.