У мэтах развіцця ўласных падсобных гаспадарак грамадзян і недапушчэння заносу ў іх афрыканскай чумы свіней (АЧС) распрацаваны ўдакладненыя рэкамендацыі аб парадку камплектавання і вырошчвання свіней.

У прыватнасці, у населеных пунктах, якія раней уваходзілі ў зоны забароны на ўтрыманне свіней, а пасля з іх былі выведзены, рэкамендавана ўтрыманне свіней на падворках грамадзян толькі для ўласных патрэб — не болей 3-х галоў для адкорму. Не дапускаецца ўтрыманне свінаматак і кныроў. Камплектаванне ўласных падсобных гаспадарак грама­дзян рэкамендавана праводзіць жывёламі са свінаводчых комплексаў. Заяўкі на патрэбу ў маладняку падаваць у мясцовыя сельвыканкамы.

Пры гэтым грамадзянам, якія жадаюць вырошчваць свіней на ўласным падворку, неабходна прытрымлівацца наступных правілаў:

— ачысціць памяшканні, дзе яны бу­дуць ўтрымлівацца;

— строга вытрымліваць узровень біялагічнай абароны: утрымліваць свіней у зачыненых памяшканнях, не дапускаць іх вольнага выгулу, кантакту з іншымі жывёламі; рэгулярна праводзіць ачыстку і дэзінфекцыю жывёлаводчых памяшканняў; вылучыць спецыяльныя абутак і адзенне, якія будуць выкарыстоўвацца толькі для догляду свіней, выкарыстоўваць асобны інвентар для догляду; пасля наведвання лесу праводзіць дэзінфекцыю адзення і абутку, а таксама па магчымасці абмежаваць наведванне памяшканняў, дзе ўтрымліваюцца свінні; не дапускаць наведвання жывёлаводчых падворкаў і памяшканняў староннімі асобамі, не набываць жывых свіней без ветэрынарных суправаджальных дакументаў, не завозіць (вывозіць) свіней без дазволу адказных асоб дзяржаўнай ветэрынарнай службы; рэгістраваць свінапагалоўе ў сельскіх выканаўчых камітэтах; усе прызначаныя для свіней віды корму (бульбу, буракі, зернесумясь і інш.) падвяргаць тэрмічнай апрацоўцы (кіпячэнню), выкарыстоўваць толькі корм, набыты праз сістэму Белкаапсаюза і іншых дзяржаўных сетак; пастаянна весці барацьбу з грызунамі; абавязкова прадастаўляць пагалоўе свіней для ветэрынарнага агляду, інфармаваць сельсаветы і дзяржаўную службу раёна пра ўсе выпадкі захворвання і гібелі свіней; не праводзіць падворны забой свіней без ветэрынарнага перадзабойнага агляду жывёл і ветэрынарна-санітарнай экспертызы мяса і прадуктаў забою спецыялістамі ветслужбы; не набываць мясапрадукты ў несанкцыянаваных месцах гандлю; утылізацыю біялагічных адходаў праводзіць у месцах, вызначаных мясцовым выканкамам.

Грамадзянам, якія жадаюць утрымліваць свіней, неабходна ўлічыць, што падчас узнікнення АЧС, акрамя парушэння ветэрынарных правілаў утрымання, забою, перамяшчэння жывёл, будуць улічвацца ўсе абставіны, якія садзейнічалі ўзнікненню і распаўсюджванню захворвання, што паўплывае не толькі на адміністрацыйную, але і крымінальную адказнасць, прадугледжаную законам, а таксама на выплату кампенсацыі за жывёлу і прадукцыю жывёлагадоўлі.

Дадзеныя рэкамендацыі не распаўсюджваюцца на забарону ўтрымання свіней у населеных пунктах, якія ўвахо­дзяць у зоны (на тэрыторыі раёна — у радыусе не меней 0,5 км ад свінаводчых ферм).

Алена КАРПЕНКА.