Молада — не зелена
За плячыма ў В.В. Александровіч, галоўнага эканаміста ААТ “Саўгас Кісялевічы”, працоўны стаж нязначны. У жніўні споўніцца два гады, як прыйшла яна ў гаспадарку маладым спецыялістам пасля заканчэння Гродзенскага аграрнага ўніверсітэта, дзе набыла спецыяльнасць эканаміста-мэнеджэра. (Да гэтага была вучоба ў Жыліцкім сельскагаспадарчым каледжы). Але жаданне да працы, імкненне спазнаць у прафесіі як мага болей і сваімі ведамі садзейнічаць развіццю сельгаспрадпрыемства паставілі маладога спецыяліста ўровень з вопытнымі і масцітымі калегамі.
Можа каму праца з лічбамі і падасца сумнай, ды толькі не Вользе. “Вядома ж, шмат новага, бываюць складанасці, — адзначае галоўны эканаміст, — але ёсць і вялікае жаданне гэта спазнаваць і вучыцца”.
Гэтым часам, да прыкладу, Вольга займаецца распрацоўкай бізнес-плану на сёлетні год. А ўвогуле ў яе працоўных абавязках — параўноўваць вытворчыя паказчыкі мінулых гадоў і бягучага, рабіць аналіз сітуацыі, якая складваецца, планаваць развіццё вытворчасці на перспектыву.
Як і большасць равеснікаў, Вольга імкнецца да пашырэння свайго кругагляду: любіць бываць у кінатэатры, слухаць добрую музыку. Шмат увагі надае здароваму ладу жыцця, прыхільніцай якога з’яўляецца. З задавальненнем наведвае з сябрамі каток, любіць адпачываць на прыродзе.
З удзячнасцю гаворыць В.В. Александровіч пра калектыў, у якім працуе, дзе яе не толькі многаму навучылі, але і даверылі адказную пасаду. У сваю чаргу, абяцае гэты давер апраўдаць сумленнай працай на карысць гаспадаркі.
А. Карпенка