Пра што гавораць лічбы
Пачатак новага года — гэта звычайна падвя- дзенне вынікаў мінулага. Падвялі іх і ў аддзеле ЗАГС Бабруйскага райвыканкама, дзе з году ў год рэгіструюць акты грамадзянскага стану сельскага насельніцтва Бабруйшчыны. З улікам таго, што паказчыкі, якія характарызуюць змены дэмаграфічнай сітуацыі, як увогуле па краіне, так і ў асобных яе рэгіёнах, заўсёды выклікалі і выклікаюць жывы інтарэс у чытачоў, мы пацікавіліся ў начальніка аддзела ЗАГС райвыканкама Таццяны Лісоўскай, як склаліся яны па выніках 2014 года.
Такім чынам даведаліся, што за мінулы год запісаў актаў грамадзянскага стану складзена некалькі меней, чым у папярэднім, 2013-ым годзе (868 супраць 944). Калі браць па відах актавых запісаў, то нараджэнняў у 2014-ым было зарэгістравана на 14 меней, чым у папярэднім (151 — 165), смярцей — на 50 меней (457 — 507). Шлюбаў у мінулым годзе было зарэгістравана болей, чым у 2013-ым (181 — 169), устанаўлення бацькоўства, наадварот, — меней (68 — 87). Апошнюю акалічнасць у аддзеле звязваюць з тым, што памер дапамогі на выхаванне дзіцяці да трох год з некаторага часу стаў аднолькавы для ўсіх маці, незалежна ад таго, “адзіночка” яна ці не, таму маладыя людзі часцей імкнуцца зарэгістраваць свой шлюб. Меней, чым у папярэднім годзе, зарэгістравана ў 2014-ым і скасаванняў шлюбаў па абаюднай згодзе (6 — 10).
З усіх зарэгістраваных у 2014 годзе нараджэнняў 68 — хлопчыкі і 83 — дзяўчынкі (у народзе існуе павер’е, што перавага дзяўчынак — да міру і спакою). Сярод нованароджаных — адна двойня.
Сярэдні ўзрост жанчын, якія ў мінулым годзе сталі маці, — 26 год (найстарэйшай — за 40), сярэдні ўзрост мужчын-бацькоў — 29 (найстарэйшаму — болей 50). Самым распаўсюджаным жаночым імем стала Анастасія (дарэчы, гэтае імя на працягу апошніх год пастаянна значылася ў тройцы лідэраў), мужчынскім — класічнае Аляксандр. Распаўсюджанымі былі таксама імёны Ксенія, Ганна, Маргарыта, Мацвей, Аляксей, Дзмітрый. Сярод рэдкіх — Давід, Назар, Агнія, Далія, Ясенія. Запісвалі дзяцей і адносна забытымі імёнамі: Сцяпан, Пятро, Зінаіда, Ніна.
Сярэдні ўзрост рэгістрацыі шлюбу для жанчын склаў 29 год, для мужчын — 33.
Калі аналізаваць у разрэзе сельсаветаў, то нараджэнняў больш за ўсё (37) ў мінулым годзе зарэгістравана Слабадкоўскім сельвыканкамам, меней астатніх (2) — Хімоўскім. На другім месцы па колькасці нованароджаных (па 19 чалавек) — Гарбацэвіцкі і Бортнікаўскі сельсаветы.
Лідэрам па “сумнай статыстыцы” стаў Слабадкоўскі сельсавет: у мінулым годзе на яго тэрыторыі зарэгістравана найбольшая колькасць смярцей (70). Амаль столькі ж (67) памерла жыхароў Бортнікаўскага сельсавета.
Найлепшы паказчык суадносінаў паміж нараджальнасцю і смяротнасцю на тэрыторыях Варатынскага (1:1,4), Слабадкоўскага (1:1,9) і Глушанскага (1:2,4) сельсаветаў, пры тым што ў цэлым па раёне гэты паказчык па выніках 2014 года, як і папярэдняга, склаў 1:3.
Алена КАРПЕНКА.