Узнагароды вартавым законнасці 

Да маючага адбыцца прафесійнага свята работнікаў пракуратуры гарадскі выканаўчы камітэт узнагародзіў Ганаровай граматай намесніка пракурора Бабруйска Алу Шастапалаву, а грашовай прэміяй — старшага памочніка пракурора горада Ірыну Хадневіч.
Абедзве яны паказваюць добрасумленныя адносіны да выканання службовых абавязкаў, высокія дасягненні ў прафесійнай дзейнасці, значны ўклад у работу па прафілактыцы злачынстваў і правапарушэнняў.

Замежны вопыт — на ўзбраенне
За перадавым вопытам у замежныя краіны ездзілі на мінулым тыдні некаторыя з бабруйскіх кіраўнікоў. Практыку работы смеццеспальваючага завода ў эстонскім Таліне вывучалі першы віцэ-мэр Алег Ковель і дырэктар прадпрыемства цеплаэнергетыкі Уладзімір Аўдзевіч.
З арганізацыяй зялёнага будаўніцтва і ландшафтнага дызайна ў сталіцы Ірландыі знаёміўся кіраўнік дарожна-эксплуатацыйнага прадпрыемства Сяргей Грэбень. Убачанае і вывучанае ў абодвух выпадках будзе карысным для пераймання ў нашым горадзе на Бярэзіне. Завод, напрыклад, зацікавіў тым, што спальвае практычна ўсе адходы і пры гэтым не забруджвае атмасферу — магчымасць яго пабудовы будзе разгледжана і ў нас. А знаходкі ў азеляненні, малых формах архітэктуры, заснятыя на фота і занатаваныя ў запісах, знойдуць увасабленне на бабруйскіх плошчах і вуліцах.

Агонь памяці ў вершах і прозе
У гонар 70-годдзя вызвалення Бабруйска і Беларусі ад нямецка-фашысцкіх захопнікаў гарадская цэнтральная бібліятэка імя М. Горкага праводзіць літаратурны конкурс “Запаліць свечку памяці”.
Удзел у ім прымаюць каля трох дзясяткаў аўтараў з больш чым сямю дзясяткамі паэтычных і празаічных твораў. У журы конкурсу ўваходзяць вядомыя грамадскія дзеячы, літаратары Бабруйска, якія і вызначаць пераможцаў да Дня горада.

І зноў запрашае “Арт-Жыжаль”
Літаральна ў мінулую пятніцу пачаў работу арганізацыйны камітэт па падрыхтоўцы і правядзенню міжнароднага пленэра па кераміцы “Арт-Жыжаль”.
У дванаццаты раз збярэ ён майстроў і пачаткоўцаў мастацтва, у якім звычайная гліна, дзякуючы фантазіі і рукам аўтараў, ажывае пад уздзеяннем агню. Як і летась, пляцоўкай для творчасці мастакоў з некалькіх краін стане гасцінная база адпачынку “Вербкі” ААТ “ФанДОК” на маляўнічым беразе Бярэзіны. Пленэр працягнецца з 10 па 31 ліпеня, а плён яго будзе традыцыйна дэманстравацца ў выставачнай зале мастацкага музея Бабруйска.

Першы раз у спартыўны клас
Гарадскі выканаўчы камітэт прыняў рашэнне аб своеасаблівай спартыўнай спецыялізацыі сярэдніх школ Бабруйска.
З пачатку будучага навучальнага года ў некаторых з іх будуць створаны спецыялізаваныя класы: у СШ № 27 — па плаванні (2 клас) і лёгкай атлетыцы (9 клас), у СШ № 32 — па вольнай барацьбе (3 клас), у СШ № 10 — па вольнай барацьбе (3 клас), у СШ № 28 — па валейболу (1 клас) і ў СШ № 1 — па настольнаму тэнісу (2 клас).

Аптымізацыя працягваецца
У адпаведнасці з рашэннем гарвыканкама працягваецца рэарганізацыя некаторых дзяржаўных устаноў адукацыі.
Зараз чарга дайшла да Цэнтра творчасці дзяцей і моладзі і Цэнтра тэхнічнай творчасці навучэнцаў Бабруйска, якія зліваюцца ў адзін. Пытанні працоўных адносін з работнікамі гэтых устаноў будуць вырашаны аддзелам адукацыі, спорта і турызма адміністрацыі Ленінскага раёна.

Поспехі для іх не абмежаваны
Як паведаміў кіраўнік адміністрацыі Ленінскага раёна Аляксандр Лісоўскі, днямі з расійскага горада-пабраціма Уладзіміра вярнулася каманда спартсменаў з абмежаванымі фізічнымі магчымасцямі, якая другі год запар перамагла ў спаборніцтвах па спартыўнаму арыентаванню на мясцовасці.

“Мара” стане рэальнасцю пры ўмове…
Аб перадачы аздараўленчага лагера “Мара” з абласной уласнасці ва ўласнасць нашага горада размовы ідуць даўно.
Неабходнасць такая выклікана абмежаванымі магчымасцямі дзіцячага санаторыя “Вясёлка” і задзейнічаннем загараднай установы круглы год. Здаецца, дамоўленнасць з уласнікам “Мары” — упраўленнем адукацыі аблвыканкама — дасягнута: перадача лагера намечана з 1 студзеня 2015 года. Але ж за час карыстання ён прыкметна паднасіўся, таму старшыня Бабруйскага гарвыканкама Дзімтрый Бонахаў справядліва прапануе правесці яе з выдаткаваннем неабходных фінансавых сродкаў на рэканструкцыю.

Аляксандр Бяляеў.