Новы кіраўнік аддзела КДБ

У мінулы панядзелак удзельнікам штотыднёвай нарады ў гарвыканкаме быў прадстаўлены новы начальнік Бабруйскага гарадскога аддзела Камітэта дзяржаўнай бяспекі Генадзь Снегаўской.
Раней ён працаваў намеснікам начальніка Гомельскага абласнога ўпраўлення КДБ.

Спальны раён абуджаецца
Яшчэ крыху, і ў 5-м мікрараёне на праспекце Будаунікоў адчыніць дзверы новы гандлёвы аб`ект.
Амаль на 15-ці сотках зямлі рэалізаваны тут інвестыцыйны праект коштам больш за 16 мільёнаў долараў. Ужо заключаны дагаворы на пастаўкі тавараў, заканчваецца навучанне набранага персаналу. Жыхарам «спальніка», які, прама скажам, пакрыўджаны адсутнасцю неабходнай інфраструктуры, гэта будзе добры падарунак ад ТАА «Дэвелопер-Інвест».

«Адно акно» без цяганіны
Улады горада ўсё больш и больш ідуць насустрач людзям, якія маюць да іх пытанні. Як паведаміла начальнік аддзела гарвыканкама па рабоце са зваротамі грамадзян Людміла Ляноўская, зараз усе заявы прымаюцца выключна на першым паверсе выканаўчага камітэта.
Падаць іх можна на рэалізацыю любой з больш чым 50 адміністратыўных працэдур, прычым і ў суботу. Сёння штодзень паслугамі службы «аднаго акна» карыстаюцца ў сярэднім 15 чалавек.

Футбольная «Белшына» умее здзіўляць
Не паспелі балельшчыкі перажыць горыч ад паражэння любімай каманды ў папярэднім туры, як футбалісты «Белшыны» парадавалі іх перамогай на выездзе. Ды якой: упершыню за 16 гадоў ім скарыліся сапернікі з салігорскага «Шахцёра» — 2:1.
Трэба ўлічыць, што сёння салігорцы знаходзяцца ў рангу ўладальнікаў Кубка Беларусі. Але і ў бабруйчан ён калісьці быў… На жаль, і апошні поспех сведчыць хутчэй аб выпадку, чым аб сістэме ў выступленнях каманды. Не ўсё добра і ў рабоце з фанатамі клуба — іх дэлегацыю днямі прымаў нават мэр Бабруйска.

Які паркан — такая і будоўля?
Дзень горада ўсё бліжэй, таму яго кіраўніцтва, як добрая гаспадыня, наводзіць бляск на аб`ектах, што будуць задзейнічаны ў праграмах святкавання 70-годдзя вызвалення Бабруйска і Беларусі ад нямецка-фашысцкіх захопнікаў, правядзення Міжнароднага фестывалю народнай творчасці «Вянок дружбы». Сярод іх і амаль ці не галоўны праспект фэсту — вуліца Сацыялістычная.
Дык вось менавіта яе сёння не ўпрыгожваюць, а «упрыгожваюць» не вельмі зграбныя парканы некалькіх будоўляў, напрыклад, каля гандлёвага дома «Вэстар», каля фабрыкі «Славянка». Старшыня гарвыканкама зрабіў распараджэнне не толькі прывесці ў парадак гэтыя будаўнічыя пляцоўкі ў месячны тэрмін, а і наогул дакументальна зацвердзіць патрабаванні да агароджвання існуючых і будучых будоўляў — з пунктаў гледжання як тэхнікі бяспекі, так і эстэтыкі.

Дэбашыраў ізалююць ад сям»і
У адпаведнасці з прынятай у красавіку ўрадам краіны пастановы аб ізаляванні асоб, што ўтвараюць у сем`ях гвалт, кіраўнік гарвыканкама Дзмітрый Бонахаў даручыў упраўленням унутраных спраў і па працы, занятасці і сацыяльнай ахове разгледзець варыянты выдзялення памяшкання для гэтай мэты.
Механізм новай справы пакуль не распрацаваны, але вядома, што змешчаныя ў яго за бойку, здзекі над хатнімі будуць пазбаўлены права не толькі перапіскі, а і зносін па тэлефоне і электроннай пошце з імі. Тэрмін ізаляцыі можа складаць ад 5 да 30 сутак і вызначаецца пасля афармлення спецыяльнага ахоўнага прадпісання.

Аляксандр Бяляеў.