З даўніх часоў у славян існуе гэтае свята, і адзначаюць яго шырока, з размахам: гульні, песні, скокі, смех, а таксама частаванні з абавязковымі і нязменнымі блінамі. На масленіцу неабходна было: “есці да ікоты, піць да пярхоты, спяваць да надсаду і скакаць да ўпаду!”

Свята Масленіцы ў Хімоўскім ВПК «Дзіцячы сад-СШ» адзначалася ў суботу, 1 сакавіка. Пачалося ўсё ў актавай зале, дзе настаўнікамі і вучнямі для гледачоў была падрыхтавана прэзентацыя пра традыцыі масленага тыдня, падчас якога прысутныя спявалі песні, адгадвалі загадкі і ўспаміналі прыказкі. Вучні 11-га класа падрыхтавалі тэатралізаваную пастаноўку “Зяці и цешчы”.

Працягнулася свята на вуліцы, дзе была арганізавана ярмарка. Вучні прынеслі многа самых разнастайных бліноў, а таксама печыва. Усе забаўляліся як маглі: хадзілі на хадулях, перацягвалі канат і скакалі праз яго.

Скончылася свята провадамі зімы і традыцыйным спальваннем чучала на школьным стадыёне, што выклікала шчырае захапленне дзяцей і дарослых.

Вікторыя Федарава,
настаўніца беларускай мовы і літаратуры Хімоўскага ВПК «Дзіцячы сад-СШ».