З мэтай развіцця даследчай дзейнасці як эфектыўнага сродку павышэння якасці адукацыі і ўсебаковага развіцця асобы школьніка штогод праводзіцца рэспубліканскі конкурс даследчых работ па вучэбных прадметах.

На раённы этап конкурсу, які прайшоў у гэтым месяцы, было прадстаўлена 28 работ з 13-ці ўстаноў сярэдняй адукацыі. З іх найбольш — па гісторыі і грамадазнаўстве. Цікавасць школьнікаў выклікалі таксама філалагічны і фізіка-матэматычны накірункі. Нямала работ, па ацэнцы журы, актуальных, з элементамі навуковай навізны.

21 лютага на базе Ленінскага ВПК “Дзіцячы сад-СШ” прайшла канферэнцыя даследчых работ школьнікаў, падчас якой яе ўдзельнікі прадэманстравалі не толькі навыкі даследчай работы, але і камунікатыўныя магчымасці. У выніку пераможцамі сталі 22 навучэнцы з 12-ці ўстаноў адукацыі. Дыпломамі 1 ступені адзначаны тры даследчыя работы, 2 і 3-й — па 7 работ. 8 навучэнцаў узнагароджаны граматамі аддзела адукацыі, спорту і турызму за выніковы ўдзел. Па рашэнні журы 6 работ — па гісторыі і грамадазнаўстве Брожскай СШ, Міхалёўскага і Ленінскага ВПК, па інфарматыцы — Варатынскай СШ, па фізіцы — Глушанскага ВПК і па геаграфіі — Бортнікаўскай СШ, будуць прадстаўлены на абласны этап конкурсу, які пройдзе ў сакавіку-красавіку сёлетняга года.

Алена КАРПЕНКА