Увесну значна ўзрастае колькасць пажараў, выкліканых выпальваннем сухой расліннасці. Гэтаму ёсць тлумачэнне: пасля зімы грамадзяне актыўна прыводзяць у парадак свае ўчасткі, ачышчаюць іх ад леташняй травы і смецця — рыхтуюцца да сяўбы. 

У Бабруйскім раёне з пачатку года, як паведаміў старшы інспектар сектара  прапаганды і ўзаемадзеяння з грамадскасцю БГРАНС Кірыл Аверчанка, адбылося 4 выпадкі ўзгарання лесу і 7 — сухой расліннасці. Ва ўсіх выпадках для тушэння пажараў прыцягваліся работнікі МНС.  

Ратавальнікі папярэджваюць — спальваць смецце трэба бяспечна, з выкананнем неабходных патрабаванняў:

• займацца гэтым варта выключна ў бязветранае надвор’е;
• кантраляваць працэс гарэння, не пакідаць агонь без нагляду;
• месца для спальвання размясціць так, каб полымя і іскры не траплялі на збудаванні, гаспадарчыя пабудовы і гаруча-змазачныя матэрыялы;
• пасля спальвання смецця вогнішча неабходна патушыць, упэўніўшыся, што не засталося ніводнай іскры.

Увага!

З 22-23 сакавіка ў большасці раёнаў краіны ўведзены абмежаванні на наведванне лясоў з-за высокай пажарнай небяспекі. Абмежаванні прадугледжваюць забарону на ўезд транспарту і развядзенне вогнішчаў. Пры гэтым прагулкі пешшу, звычайна, дазволены, калі няма поўнай забароны.

Ратавальнікі нагадваюць: калі вы сталі сведкам узгарання, тэрмінова паведамце пра гэта па тэлефонах 101 або 112.