У раёне пачаўся рамонтны сезон
З пачатку лістапада ў раёне пачаўся рамонтны сезон. Да гэтага часу ў гаспадарках распрацавалі графікі рамонту тэхнікі, стварылі звенні, якія будуць яго ажыццяўляць, а таксама камісіі пра прыёмцы ўжо адрамантаваных сельгасмашын.
На гэты час, як адзначыў начальнік вытворчага аддзела ўпраўлення сельскай гаспадаркі і харчавання райвыканкама Віталь Епіхаў, уся тэхніка прадэфектавана, накіраваны заяўкі для набыцця неабходных запчастак.
Была праведзена праверка тэхнікі на прадмет яе пастаноўкі на працяглае захаванне, а таксама праверка падрыхтоўкі майстэрань да рамонту ў зімовых умовах. Вынікі агляду, якія былі падведзены на базе філіяла “Харчавік-Агра” ААТ “Чырвоны харчавік”, паказалі, што тэхніка, якая ўжо не задзейнічана ў палявых работах, пастаўлена ў гаспадарках на працяглае захаванне. Рамонтныя майстэрні, як тое і патрабуецца, падрыхтаваны да ацяпляльнага сезону: уцеплены вароты, дзверы, вокны, маюцца прыстасаванні для падагрэву вады, наладжаны абагрэў працоўных месцаў, на тэрыторыях рамонтных майстэрань наведзены парадак.
Да таго ж, як паведамілі ў райсельгасхарчы, кожны аўторак у гэтую пару, пачаргова ў кожнай гаспадарцы, праводзяцца рабочыя нарады галоўных інжынераў сельгасарганізацый. Іх мэта — вырашэнне надзённых пытанняў, звязаных з рамонтам тэхнікі ў зімовых умовах, перайманне спецыялістамі адзін у аднаго лепшага вопыту па арганізацыі работы майстэрань, пастаноўцы сельгасмашын на працяглае захаванне.
Алена КАРПЕНКА.