Гаспадаркі рыхтуюцца да яравой сяўбы
Адна са складаючых добрага ўраджаю — своечасова і ў дастатковай колькасці ўнесеныя ў глебу арганічныя і мінеральныя ўгнаенні. Што тычыцца апошніх, то, як паведаміла галоўны аграхімік раёна В.Л. Бобікава, пад яравую сяўбу гэтага года раёну неабходна мець 11500 тон спажыўных рэчываў, у тым ліку 4800 тон — азотных угнаенняў, 1700 — фосфарных і 5000 — калійных. Азотныя і фосфарныя ўгнаенні на гэты час набываюцца за кошт сродкаў абласнога бюджэту, калійныя — за кошт уласных сродкаў гаспадарак.
На сёння, з улікам унесеных з восені пад зябліва, у раёне маецца 27 працэнтаў ад патрэбы азотных угнаенняў, 16 — фосфарных і 20 — калійных. Дарэчы, калій, увесь, што меўся, быў унесены пад зябліва. Літаральна з учарашняга дня пачала паступаць недастаючая яго колькасць. Усяго калійных угнаенняў павінна паступіць 6900 тон. Гэтага гаспадаркам будзе дастаткова пад поўную патрэбу. З восені пад зябліва таксама ўнеслі 107 тон фосфарных угнаенняў. Больш за ўсіх калійных і фосфарных угнаенняў пад зябліва ўнеслі ў СВК “Гігант” (хлорыстага калію — 342 т на 685 га, амафосу — 75 т на 376 га, суперфасфату — 14,5 т на 71 га). Нядрэнна ў гэтым плане папрацавалі ў СВК “Калгас імя А. Неўскага”, БТАА “Амега-Люкс”, ААТ “Агракамбінат “Бабруйскі” і ў філіяле “Варатынь” РУП “БЗТДіА”. А вось у Бабруйскім ААТ “Аграмашсервіс” з восені ўвогуле не ўносілі мінеральныя ўгнаенні.
Што да арганікі, то яе да 1 мая неабходна нарыхтаваць, вывезці і ўнесці ў глебу 290 тысяч тон. З іх 163,8 тыс. тон, з улікам унесенай пад зябліва, ужо на палі вывезена і ўнесена. Больш за ўсіх арганічных угнаенняў у глебу ўнесена ў СВК “Гігант”: з запланаваных 46,8 тысяч тон — 40 тысяч, або 86 працэнтаў ад плану. Нядрэнна вывазкай займаюцца ў СВК “Калгас імя А. Неўскага”, а таксама філіяле “Варатынь”. Актыўнасць дадзеных гаспадарак апраўдана: увесну тут будзе магчымасць больш увагі надаць іншым палявым работам. А вось пра “Агракамбінат “Бабруйскі” такога сказаць нельга: тут пад зябліва арганіку ўвогуле не ўносілі.
Між тым, гэтым часам вывазка арганічных угнаенняў на палі працягваецца.
Алена КАРПЕНКА.
Алена КАРПЕНКА.
