Адзіны дзень інфармавання, прымеркаваны да 80-годдзя Перамогі савецкага народа ў Вялікай Айчыннай вайне, прайшоў сёння на Бабруйшчыне. Падчас яго інфармацыйна-прапагандысцкія групы пабылі ў сельскагаспадарчых і іншых арганізацыях раёна.

Да прыкладу, інфармацыйна-прапагандысцкая група пад кіраўніцтвам старшыні райвыканкама Міхаіла Крыцкага наведала СВК “Гігант”. Свой зварот да калектыву кіраўнік раёна пачаў з расповеду пра мерапрыемства, на якім толькі што пабыў — ускладзенне кветак, разам з прадстаўнікамі Савета старэйшын пры Мінскім абласным выканаўчым камітэце, да Кургана Славы ў Сычкава.

— Мы павінны ўшаноўваць памяць людзей, якія загінулі, абараняючы Айчыну ад вогара, якія цаной свайго жыцця здабылі нам мірнае жыццё, — адзначыў Міхаіл Крыцкі і засяродзіў увагу на тым, што Курган Славы на Бабруйшчыне — адзін з двух у краіне. Добраўпарадкоўваць мемарыял, падтрымліваць на ім чысціню і парадак — агульная справа.

Пра тое, што перамога ў Вялікай Айчыннай вайне заўжды будзе выклікаць гонар і ўдзячнасць у сэрцах беларусаў, гаварыла начальнік аддзела па зваротах грамадзян і юрыдычных асоб райвыканкама Наталля Тропіна. З яе даклада прысутныя даведаліся пра новыя “жорсткія” факты генацыду беларускага народа ў гады вайны, а таксама пра ініцыянаваную Генеральнай пракуратурай краіны крымінальную справу за гэта, пра палажэнні абноўленай Канстытуцыі, накіраваныя на захаванне гістарычнай праўды і памяці, пра работу, якая праводзіцца ў раёне па ўвекавечанні памяці воінаў і ўшанаванні людзей, на чый лёс выпала ваеннае ліхалецце.

Апошняе дапоўніла першы сакратар РК ГА “БРСМ” Дар’я Панцялеева. Яна, у прыватнасці, адзначыла, што днямі члены  моладзевай арганізацыі наведалі малалетняга вязня канцлагера Кацярыну Іванаўну Кругляк у аг. Хімы, паслухалі ўспаміны жанчыны, паабяцалі рабіць усё магчымае для захавання міру. Актывам арганізацыі правялі добраўпарадкаванне помніка землякам, якія загінулі ў гады вайны, у в. Слабада і намераны добра папрацаваць на добраўпарадкаванні Кургана Славы. А ў маі прымуць удзел у маладзёжным аўтапрабегу па маршруце памяці, плануюць ацыфраваць брацкую магілу ў в. Слабодка і г. д.

Пра немалую работу, якая ў дадзеным накірунку праводзіцца калектывам СВК “Гігант”, у тым ліку сумесна з Бортнікаўскім сельвыканкамам і мясцовай школай, распавёў старшыня праўлення “Гіганта” Васіль Жук. Загадчыца калгаснай гасцініцы Галіна Захарчук у звароце да моладзі заклікала яе цікавіцца гераічнымі старонкамі гісторыі. А Міхаіл Крыцкі ў сваю чаргу заклікаў здзяйсняць подзівігі працоўныя, што ў калектыва добра атрымоўваецца, як падзяку прадзедам за шчаслівае сёння.   

Алена КАРПЕНКА. Віктар ШЭЙКІН.

***