Актыўна ўключыўшыся ў пасяўную кампанію, з 305 гектараў, якія ў гаспадарцы планавалі заняць пад зернебабовыя расліны, яравыя ячмень і пшаніцу, па стане на раніцу аўторка пасеялі 260 гектараў. І ў той жа дзень, пры спрыяльных умовах, гэтую работу намерваліся завяршыць.

—Задзейнічана на сяўбе 2 адзінкі тэхнікі. Пасяўным агрэгатам: трактарам Беларус-3522 з АКПМ-6 запраўляе Аліхан Кантаеў, на сеялцы ЗС-4,2 працуе Аляксандр Курловіч. На ворыўных работах задзейнічаны механізатар Аляксандр Рагалевіч, яго тэхніка — трактар 3522 з плугам ППО 9-45. На падрыхтоўцы глебы да сяўбы на такім жа трактары з КШП-10 — Яўген Меснік, — упэўнена пералічвае хлебаробаў і тэхніку галоўны аграном сельгаспрадпрыемства Марына Капорына.
Не забываюцца ў сельгасарганізацыі на догляд азімых. Увесь іх клінок — а гэта 900 гектараў збожжавых раслін, 70 га азімага рапсу і 10 га азімай сурэпіцы, як заўважыў дырэктар ААТ “Саўгас Кісялевічы” Валерый Сяргейчык, па першым разе цалкам падкормлены.

Алена КАРПЕНКА.