Даволі паспяхова выступілі навучэнцы раённай спартыўнай школы ў першынстве Рэспубліканскага цэнтра фізічнага выхавання і спорту навучэнцаў і студэнтаў па лёгкай атлетыцы, якія прайшлі з 30 верасня па 2 кастрычніка ў Мінску.

Каманда юных легкаатлетаў, якую падрыхтавалі трэнеры ДЮСШ АФП  раёна Аляксандр Гацко і Лілія Асташкевіч, у камандным першынстве заняла 7-е месца (усяго ўдзел прыняло больш за 20 каманд рэспублікі).

У асабістым першынстве з найбольшым поспехам выступіла Таццяна Шынкаронак, якая заняла 3-е месца ў забегу на 1000 метраў у першы дзень спаборніцтваў і ўпэўнена атрымала перамогу ў другі дзень на дыстанцыі 2000 метраў. 3-е месца на гэтай жа дыстанцыі заняла яшчэ адна прадстаўніца нашага раёна Кацярына Вавула. Усяго кроку да п’едэстала гонару не хапіла Наталлі Вавула і Стасу Пірожніку, якія на дыстанцыі 2000 і 600 метраў суадносна сталі чацвёртымі. У Стаса, да таго ж, 5-е месца ў забегу на 1000 метраў.

Акрамя вышэйназваных навучэнцаў у рэспубліканскім першынстве ўдзельнічалі Вераніка Паслядовіч і Святлана Манько.

Алена КАРПЕНКА.