III Рэспубліканскі форум працаўніц вёскі праходзіў у сталіцы Беларусі 14-15 лістапада. Яго ўдзельніцы — прадстаўніцы аграпрамысловага комплексу з усёй краіны, чыё стаўленне да працоўных абавязкаў заслугоўвае пашаны, а дасягненні ў прафесіі прызнаны аднымі з найлепшых.

На форуме ў Мінску пабылі і тры работніцы сельгаспрадпрыемстваў нашга раёна. Высокага гонару ўдастоіліся работнікі СВК “Гігант” Людміла Зыкун і Марыя Хурсан, а таксама аператар па штучным асемяненні жывёлы ААТ “Неўскі-Агра” Таццяна Косцева.  

Пасля вяртання мы запыталіся ў Марыі Хурсан, як прайшло мерапрыемства ў сталіцы і якія пакінула ўражанні:

— Спадабалася выключна ўсё — ад цудоўнага прыёму нас, сяльчанак, да слоў падзякі за працу і віншаванняў з прафесійным святам высокімі адказнымі асобамі краіны. Шмат станоўчых уражанняў пакінула экскурсія па Мінску — такая прыгожая наша сталіца! Надоўга запомніцца наведванне храма Усіх Святых і іншых цікавых месцаў. І вельмі-вельмі спадабалася балетная пастаноўка «Золушка» — да гэтага ў Вялікім тэатры оперы і балета пабыць мне не давялося. Так што разам з сувенірамі прывезла з форуму выдатны настрой і жаданне працаваць яшчэ лепш. І гэта, лічу, галоўнае.  

Алена КАРПЕНКА.